ބޮލީވުޑްގައި ކާމިޔާބު ގިނަ ފިލްމުތަކެއް ކުޅެދީފައިވާ އެތައް ތަރިންނެއް މިއަދު ފިލްމީ ދާއިރާއާ ދުރަށް ގޮސްފައިވެ އެވެ. އެހެން ނަމަވެސް އެއިން އެއްވެސް ތަރިއެއްގެ މަތިން ބެލުންތެރިން ހަނދާން ނައްތައެއް ނުލަ އެވެ. އެ ތަރިން އަނބުރާ ފިލްމުތަކަށް އައުމަށް ގިނަ ބަޔަކު އެދެ އެވެ.

މިއަހަރު ނުކުތް އެނިމަލްއިން ފެނިގެންދިޔަ ބޮބީ ޑިއޯލްއަކީ އެފަދަ ތަރި އެކެވެ. ގިނަ ދުވަސްތަކެއް ވަންދެން ފިލްމުތަކާ ދުރުގައި ހުރުމަށްފަހު އެ ފިލްމުގައި އޭނާ ދައްކައިދިން އެކްޓިންއަށް އެންމެންގެ ތައުރީފް ވެސް ލިބުނެވެ. މި ލިޔުމުގައި މި ބަލާލަނީ 2024 ގައި ބޮލީވުޑަށް އެނބުރި އަންނަ ބައެއް ތަރިންނަށެވެ.

އިމްރާން ޚާން

2000ގެ ކާމިޔާބު ފިލްމުތަކަކުން ފެނިގެން ގޮސްފައިވާ އިމްރާން އެންމެ ފަހުން ފެނިގެން ދިޔައީ 2015 ވަނަ އަހަރު ނުކުތް "ކައްޓީ ބައްޓީ"އިންނެވެ. އެހެން ނަމަވެސް އާ ހިތްވަރަކާއި އާ އަޒުމަކާއެކު 2024ގައި އޭނާ ބޮލީވުޑަށް އެނބުރި އަންނާނެ އެވެ.

ޒީނަތު އަމަން

ޒީނަތު އަމަންއަކީ އެއްވެސް ތައާރަފަކަށް ބޭނުންވާ ތަރިއެއް ނޫނެވެ. 1970ގެ އަހަރުތަކުން ފެށިގެން 2000ގެ އަހަރުތަކާ ހަމައަށް ވެސް އޭނާ ބޮލީވުޑްގައި މަސައްކަތްކުރި އެވެ. މެދުކެނޑުމަކަށްފަހު ޒީނަތު އަންނަނީ ވަރުގަދަ އެނބުރި އައުމަކަށް ތައްޔާރު ވަމުންނެވެ.

ޒައިދު ޚާން

"މެއިން ހޫ ނާ"އިން ގިނަ ބައެއްގެ ސަމާލުކަން ހޯދި ޒައިދު ޚާން ފިލްމީ ދާއިރާއާ ދުރުގައި ހުންނަތާ އަހަރުތަކެއް ވެއްޖެ އެވެ. އޭނާގެ ފިލްމަކަށް އިންތިޒާރު ކޮށްގެން ތިބި މީހުންނަށް އަންނަ އަހަރު އޭނާގެ ފިލްމެއް ފެންނާނެ އެވެ.