މަދޫރީ ޑިކްސިޓްއަކީ އޭނާގެ ރީތިކަމާއި އެކްޓިން ހުނަރުތަކުގެ ސަބަބުން އާއްމުންގެ މެދުގައި ބޮޑު މަގުބޫލުކަމެއް ހޯދާފައިވާ ފަންނާނެކެވެ.

މިހާރަަކަށް އައިސް އޭނާ ސިޔާސީ ދާއިރާއަށް ނުކުންނަން އުޅޭ ކަމަށާއި ކުރިއަށް އޮތް އިންޑިއާގެ މަޖިލިސް އިންތިހާބުގައި ވާދަކުރަން ނިންމާފައިވާ ކަމަށް އަޑުތައް ވަނީ ފެތުރިފަ އެވެ.

އެންމެފަހުން މަދޫރީ މިވަނީ މި ވާހަކަތަކަށް ރައްދު ދީފަ އެވެ. މީޑިއާއަކަށް ދިން އިންޓަވިއުއެއްގައި މަދޫރީ ބުނީ ސިޔާސީ ދާއިރާއަކީ އޭނާ އެހާ ގަޔާވާ ދާއިރާއެއް ނޫން ކަމަށެވެ.

މަދޫރީ އިތުރަށް ބުނީ އިންޑިއާގައި އިންތިހާބެއް އޮންނަ ކޮންމެ ފަހަރަކު އޭނާއާ ބެހޭ ގޮތުން އެފަދަ އަޑުތަކެއް މީޑިއާގައި ފެތުރޭ ކަމަށެވެ.

1990ގެ އަހަރުތަކުގައި ބޮލީވުޑްގެ ގިނަ ފިލްމުތަކަކުން ފެނިގެންދިޔަ މަދޫރީއަކީ މިއަދުވެސް ގިނަ ބަޔަކު ލޯބިކުރާ ފަންނާނެކެވެ. އޭނާގެ މަޝްހޫރު ފިލްމުތަކުގެ ތެރޭގައި "ދިލް"، "ހަމް އާޕްކޭ ހޭ ކޯން" އަދި "ދިލް ތޯ ޕާގަލް ހޭ" ހިމެނެ އެވެ.