ބޮލީވުޑްގެ އެކްޓަރު ސަލްމާން ޚާން ވަނީ ދާދި ފަހުން އޭނާގެ 58 ވަނަ އުފަން ދުވަސް ފާހަގަކޮށްފަ އެވެ. އެ ދުވަހުގެ މުނާސަބަތުގައި އޭނާ މީގެ ކުރިން ދީފައިވާ ބައެއް އިންޓަވިއުތައް ވަނީ ފެންމަތިވެފަ އެވެ.

އެގޮތުން ފެންމަތިވި އެއް ވީޑިއޯއަށް ގިނަ ބައެއްގެ ސަމާލުކަން މިވަނީ ހުއްޓިފަ އެވެ. 2017 ވަނަ އަހަރު ސަލްމާން ދިން އެ އިންޓަވިއުގައި އޭނާ ވަނީ އޭނާގެ އުމުރާ ބެހޭ ގޮތުން ވާހަކަ ދައްކާފަ އެވެ.

އެ ވީޑިއޯގައި ސަލްމާން ބުނީ އޭނާގެ އުމުރުން ދުވަސްވާހެން ހީނުވާކަމަށާއި އޭނާއަކީ އަދިވެސް 13 އަހަރުގެ ފުރާވަރު ކުއްޖެއް ކަމަށް އޭނާގެ މަންމަ ބުނާ ކަމަށެވެ.

އެހެން ނަމަވެސް ކުރިއަށްވުރެ ގިނައިން މިހާރު އަނިޔާވާ ކަމަށާއި މާ ބޮޑަށް ތަދު އިހުސާސް ކުރެވޭ ކަމަށް އޭނާ ބުންޏެވެ. އަދި ނިދެނީ ވެސް އެންމެ ހަތަރު ގަޑިއިރު ކަމަށް އޭނާ ބުނެފައިވެ އެވެ.

ސަލްމާން އިތުރަށް ބުނީ މީހަކަށް އޭނާގެ އުމުރުން ދުވަސްވާހެން ހީވާން ފަށާނީ ދިރިއުޅުމާމެދު ފޫހިވެ ކުރާނެ ކަމެއް ނެތުމުން ކަމަށެވެ.