މިދިޔަ އަހަރު ނޮވެމްބަރު މަހު ރިލީޒްކުރި ރަންބީރު ކަޕޫރުގެ ފިލްމު "އެނިމަލް"އަށް ލިބުނު ކާމިޔާބީ ފާހަގަ ކުރުމުގެ ގޮތުން ބޮޑު ހަފްލާއެއް ބޭއްވުމަށް އެ ފިލްމުގެ ޕްރޮޑިއުސަރުން ނިންމައިފި އެވެ.

ހަބަރުތައް ބުނާ ގޮތުގައި މި ޖެނުއަރީ މަހުގެ ހަވަނަ ދުވަހު ބާއްވަން ހަމަޖެހިފައިވާ އެ ހަފްލާގައި ދާއިރާގެ ތަރިންގެ އިތުރުން އިންޑިއާގެ ނަން ހިނގާ މަޝްހޫރު ޝަހުސިއްޔަތުން ބައިވެރިވާނެ އެވެ.

ބައްޕައަކާއި ދަރިއެއްގެ ގުޅުމުގެ މައްޗަށް ހަދާފައިވާ އެ ފިލްމަށް އާއްމުންގެ ބޮޑު ތަރުހީބެއް އަންނަނީ ލިބެމުންނެވެ. ބޮކްސް އޮފީހުގައި މިހާތަނަށް އެ ފިލްމަށް 550 ކްރޯޑް ރުޕީސްގެ އާމްދަނީއެއް ލިބިފައިވެ އެވެ.

އޭގެ އިތުރުން އެ ފިލްމުގައި ރަންބީރު ދައްކަުވައިދިން އެކްޓިން ވެސް ގިނަ ބަޔަކު އަންނަނީ ފާހަގަ ކުރަމުންނެވެ. ހަމައެއާއެކު ފިލްމުގެ ވިލަން ބޮބީ ޑިއޯލްއަށް ވެސް ގިނަ ބައެއްގެ ތައުރީފު ލިބެމުންދެ އެވެ.

ފިލްމު ރިލީޒް ކުރިތާ މަހަކަށްވުރެ ގިނަ ދުވަސްވެފައިވާއިރު އަދިވެސް އެ ފިލްމު އަންނަނީ އިންޑިއާގެ އިތުރުން ދުނިޔޭގެ އެހެން ގައުމުތަކުގެ ބައެއް ސިނަމާތަކުގައި ވެސް ދައްކަމުންނެވެ.