ރަންވީރު ސިންހްއާއި ދީޕިކާ ޕަދުކޯންއަކީ ބޮލީވުޑްގެ ޖޯޑުތަކުގެ ތެރެއިން ގިނަ ބައެއްގެ ލޯބި ހޯދާފައިވާ ދެ ތަރިންނެވެ. އެ ދެމީހުންގެ ޒާތީ ދިރިއުޅުމަށް ގިނަ މީހުންގެ ސަމާލުކަން އަބަދުވެސް ލިބެ އެވެ.

2018 ވަނަ އަހަރު ކައިވެނިކުރި ރަންވީރާއި ދީޕިކާއަށް މިހާތަނަށް ދަރިއަކު ލިބިފައެއް ނުވެ އެވެ. އެހެން ނަމަވެސް ދީޕިކާ މިވަނީ އެކަމުގެ އިޝާރާތެއް ދީފަ އެވެ.

މީޑިއާއަށް ދިން އިންޓަވިއުއެއްގައި ދީޕިކާ ބުނީ އެ ދެމީހުންނަކީ ވެސް ކުޑަކުދިން ދެކެ އިންތިހާއަށް ލޯބިވާ ދެމީހުން ކަމަށާއި އެމީހުންގެ އަމިއްލަ ދަރިއަކު ލިބޭނެ ދުވަހަކަށް އިންތިޒާރުކުރާ ކަމަށެވެ.

މިއާއެކު ގިނަ ބަޔަކު އަންނަނީ އެ ދެމަފިރިން މިހާރު އާއިލާ ރޭވުމުގެ މަސައްކަތް ކުރާ ކަމަށް ބުނަމުންނެވެ. އެގޮތުން އަވަސް މުސްތަގުބަލެއްގައި ދީޕިކާ ބަނޑުބޮޑުކަން އިއުލާން ކުރާނެ ކަަމަށް ވެސް ލަފާކޮށްފަ އެވެ.

ފިލްމީ މަސައްކަތްތަކަށް ބަލާއިރު ދީޕިކާ އެންމެ ފަހުން ފެނިފައިވަނީ ޝާހްރުކް ޚާންއާއެކު ޕަތާން އިންނެވެ. އޭނާގެ ކުރިއަށް އޮތް ފިލްމަކީ ރިތިކް ރޯޝަންގެ ފައިޓާ އެވެ.