ސުނިލް ޝެޓީއަކީ މިއަދާ ހަމައަށް ވެސް ބޮލީވުޑްގެ އެންމެ މަގުބޫލު ތަރިންގެ ތެރޭގައި ހިމެނޭ ތަރި އެކެވެ. އޭނާގެ އެކްޓިން ހުނަރުގެ އިތުރުން ސުނިލްއަކީ އޭނާގެ ރީތިކަމަށް ވެސް މަޝްހޫރު މީހެކެވެ.

ނޫސްވެރިންގެ ބައްދަލުވުމެއްގައި ވާހަކަދައްކަމުން ސުނިލް ބުނީ އޭނާގެ އުމުރާ އަޅާބަލައިރު ހަށިގަނޑު ތަފާތުކަން މީހުން ފާހަގަކުރާ ކަމަށެވެ.

ހަމަ އެހެންމެ މެދު އުމުރަށް ދިޔައިރު ވެސް މުސްކުޅި ނުވެ، ޒުވާންކަން މަތީގައި ހުންނަނީ ކިހިނެއްތޯ ގިނަ ބަޔަކު ސޯޝަލް މީޑިއާއާއި އެހެނިހެން ގޮތްގޮތުން ވެސް އޭނާ ގާތު އަހާ ކަމަށް ސުނިލް ބުނެފައިވެ އެވެ.

ސުނިލް ބުނިގޮތުގައި ޒުވާންކަން މަތީގައި ހުރުމަށްޓަކައި މުހިންމު ވަނީ ސާޖަރީ އާއި ފޭޝަލް ތެރަޕީތަކެއް ނޫނެވެ. އަދި އެކަމަށް މުހިއްމީ ދުޅަހެޔޮ ސިއްހަތެއްގައި ހުރުން ކަމުގައި އޭނާ ބުނެފައިވެ އެވެ.

ސުނިލް ބުނީ ރާ ބުއިމާއި ސިނގިރޭޓު ބުއިމަކީ ބޭކާރު ކަމެއް ކަމަށާއި، އިންސާނާގެ ހަށިގަނޑަށް ބޭނުން ނުވާ ގެއްލުން ދެނިވި ތަކެތި އޭނާގެ ހަށިގަނޑަށް ދިޔަ ނުދޭ ކަމަށެވެ. މެދު އުމުރަށް ދިއުމުން ވެސް ޒުވާންކަން މަތީ ހުންނަނީ އެހެންވެ ކަމަށް އޭނާ ބުނެ އެވެ.

"ބޯޑާ" އާއި "ދަޑްކަން" އަދި "ހޭރާ ޕޭރީ" ފަދަ ކާމިޔާބު ފިލްމުތަކެއް ކުޅެފައިވާ ސުނިލް، 60، މިހާރު ބޮލީވުޑްގެ އިތުުރުން ތެލުގޫ ފިލްމުތަކުން ވެސް ފެނެ އެވެ.