އިންޑިއާގެ ޓީވީ ތަރިއެއް ކަމަށްވާ ރާކީ ސާވަންތު ދިވެހި ރާއްޖެއަށް ފާޑުކިޔައި ފުރައްސާރަ ކުރުމުން ދިވެހިން އޭނާއަށް ރައްދު ދީފި އެވެ.

ޓިކްޓޮކްގައި ރާކީ އާއްމުކުރި ވީޑިއޯގައި އޭނާ ބުނެފައިވަނީ އޭނާގެ ހަޔާތުގައި ވެސް ދެން ރާއްޖެ ނައުމަށް ނަދުރު ބުނާ ކަމަށާއި އިންޑިއާއާ "ބެހުމަށް" ރާއްޖޭގެ އެއްވެސް ހައިސިއްޔަތެއް ނެތް ކަމަށެވެ.

އޭގެ އިތުރުން ވެސް އެ ވީޑިއޯގައި ރާކީ ވަނީ ވަރަށް ހަޑި ހުތުރު ބަހުރުވައަކުން ދިވެހިރާއްޖެއަށާއި ދިވެހިންނަށް ފުރައްސާރަ ކޮށްފަ އެވެ.

އެއާއެކު ސޯޝަލް މީޑިއާ ބޭނުންކުރާ ގިނަ ދިވެހިން ވަނީ ރާއްޖޭގެ ދިފާއުގައި ނުކުމެފަ އެވެ. އެގޮތުން ރާކީއަކީ ޕްލާސްޓިކް ސާޖަރީ ހަދާފައި ހުރި މީހެއްކަން ދޭހަވާ ގޮތަށް ދިވެހި ރާއްޖެއަށް ޕްލާސްޓިކް އެތެރެ ކުރުން މަނާ ކުރެވިފައިވާ ކަމަށް ގިނަ މީހުން ބުނެފައިވެ އެވެ.

ރާކީއަކީ އޭނާގެ އަމިއްލަ ގައުމު އިންޑިއާގައި ވެސް ބޮޑު "ޖޯކެއްގެ" ގޮތުގައި މީހުން ގަބޫލުކުރާ ތަރި އެކެވެ. އޭނާގެ ބަހާއި އަމަލުތައް ހުންނަ ގޮތުން ޚުދު އިންޑިއާގެ މީހުން ވެސް އޭނާއަށް ފާޑުކިޔައި ފުރައްސާރަ ކުރެ އެވެ.