ރިތިކް ރޯޝަންއަކީ އެކްޓް ކުރުމުގެ ހުނަރުގެ އިތުރުން އޭނާގެ ފުރިހަމަ ސިއްހަތާއި ހަށިގަނޑަށްޓަކައި ގިނަ ބައެއްގެ މަގުބޫލުކަން ހޯދާފައިވާ ތަރި އެކެވެ. ރިތިކްގެ "ސިކްސް ޕެކް"އަކީ އާއްމުން އަޅައިގަންނަ ސިފައެއްގެ ގޮތުގައި ގިނަ މީހުން ބުނެ އެވެ.

ރިތިކްގެ ފިޓްނެސް ޓްރެއިނާ ކްރިސް ގެތިން މިވަނީ ރިތިކްގެ ރީތި ހަށިގަނޑުގެ ފަހަތުގައިވާ ސިއްރުތައް ކިޔައިދީފަ އެވެ. އިންޑިއާގެ މީޑިއާއަކަށް ދިން އިންޓަވިއުއެއްގައި ރިތިކްގެ އާދަތައް ވަރަށް ތަފްސީލުކޮށް ކްރިސް ކިޔައިދިނެވެ.

ކްރިސް ބުނީ ރިތިކް ދުވާލަކު ގާތްގަނޑަކަށް ހައެއްކަ ފަހަރު ކާ ކަމަށާއި ކެއުމުގައި ގިނައިން ޕްރޮޓީންސް ހިމެނޭ މަހުގެ ބާވަތްތައް ހިމަނަން އިސްކަންދޭ ކަމަށެވެ.

ކެއުމުގެ އިތުރުން ކަސްރަތު ކުރުމަކީ ވެސް ރިތިކްގެ ކޮންމެ ދުވަހެއްގެ ތާވަލުގައި ހިމެނޭ ކަމެއް ކަމަށް ކްރިސް ބުންޏެވެ. އެގޮތުން ދުވާލަކު މަދުވެގެން އެއް ފަހަރު ކާޑިއޯ ހެދުމަކީ ރިތިކްގެ އާދައެއް ކަމަށް ކްރިސް ބުންޏެވެ.

ރަނގަޅަށް ކެއުމާއި ކަސްރަތުގެ އިތުރުން ގަޑިއަށް ނިދުމަކީ ވެސް ރަނގަޅު ސިއްހަތެއްގައި ހުރުމަށާއި ހަށިގަނޑު ރީތިކުރުމަށް މުހިއްމު ކަމެއްގެ ގޮތުގައި ކްރިސް ފާހަގަ ކުރި އެވެ. ކޮންމެ ރެއަކު ވެސް ނުވައެއް ޖަހާއިރު ރިތިކް ނިދާ ކަމަށް ކްރިސް ބުނެ އެވެ.

ފިލްމީ މަސައްކަތްތަކަށް ބަލާލާއިރު ރިތިކް ދެން އެންމެ އަވަހަށް ފެންނާނީ ދީޕިކާ ޕަދުކޯންއާއި އަނިލް ކަޕޫރުވެސް ފެނިގެންދާ "ފައިޓާ"އިންނެވެ.