ބޮލީވުޑްގެ ފިލްމުތަކަށް ހާއްސަކޮށްގެން ބާއްވާ އެންމެ ބޮޑު އެއް އެވޯޑް ޝޯ ކަމަށްވާ ފިލްމް ފެއާ އެވޯޑްސްގެ މިއަހަރުގެ އިވެންޓްގެ ނޮމިނޭޝަންތައް އިއުލާން ކޮށްފި އެވެ.

69 ވަނަ ފިލްމްފެއާ އެވޯޑްސްގެ ނޮމިނޭޝަންތައް އިއުލާން ކޮށްފައިވާއިރު އެ ނޮމިނޭޝަންތަކުން ގިނަ ބަޔަކަށް ހައިރާންކަން ވެސް ވަނީ ގެނުވާފަ އެވެ.

އެގޮތުން 19 ނޮމިނޭޝަންއާއެކު ރަންބީރުގެ "އެނިމަލް" އެންމެ ކުރީގައި އުޅޭއިރު އެންމެ ޝަރަފުވެރި އެވޯޑްކަމަށްވާ ބެސްޓް އެކްޓާ ކެޓެގަރީއަށް ދެ ފިލްމަކުން ޝާހުރުކް ޚާން ނޮމިނޭޓްވެފައިވެ އެވެ. އެއީ ޖަވާންއާއި ޑަަންކީ އެވެ.

މީގެ އިތުރުން ވެސް ވަރަށް ފަހުން ނެރުނު ފިލްމެއް ކަމަށްވާ "ޓުވެލްވްތު ފެއިލް"އަށް ވެސް ވަނީ ދެތިން ކެޓެގަރީއަކުން ނޮމިނޭޝަން ލިބިފަ އެވެ.

މި އަހަރުގެ ފިލްމްފެއާ އެވޯޑްސް އޮންނާނީ ޖެނުއަރީ މަހުގެ 28 ވަނަ ދުވަހު ގުޖުރާތުގަ އެވެ. ކޮންމެ އަހަރަކުވެސް މި ހަފްލާއަށް ގިނަ ބައެއްގެ ސަމާލުކަން ލިބެ އެވެ.