ޝާހްރުކް ޚާންއާއި ސަލްމާން ޚާންއަކީ މި ޖީލުގެ އެންމެ ފުންނާބު އުސް ބޮލީވުޑްގެ ތަރިން ކަމުގައި ބުނުމަކުން ދޮގަކަށް ނުވާނެ އެވެ. މިފަހުން ހުރިހާ ގިލަން ޝަކުވާއެއް އެއް ފަރާތްކޮށް ދެ ތަރިން އެކުގައި ބައެއް ފިލްމުތަކުން ފެނުނު ނަމަވެސް އެ ދެ ތަރިންނަކީ ގިނަ ދުވަސްތަކެއް ވަންދެން ދުޝްމަނުންނެވެ.

އެގޮތުން ވަރަށް ފަހުން އާއްމުވި ޝާހްރުކް ޚާންގެ ކުރީގެ ވީޑިއޯއެއްގައި އޭނާ ވަނީ އޭނާއާއި ސަލްމާންގެ ގުޅުމާ ބެހޭ ގޮތުން ވާހަކަ ދައްކާފަ އެވެ.

އެގޮތުން ޝާހްރުކް ޚާން ބުނީ ސަލްމާން މާ "ގުންޑާ"ކޮށް އުޅޭތީ އެންމެންނަށް އޭނާއަކީ ޝާހްރުކް ޚާންއަށްވުރެ ދޮށީ މީހެއްހެން ހީވިނަމަވެސް ހަގީގަތުގައި ސަލްމާން ޝާހްރުކް ޚާނަށްވުރެ ހަގު ކަމަށެވެ.

އޭގެ އިތުރުން ވެސް ޝާހްރުކް ޚާން ފިލްމީ ދާއިރާއަށް ތައާރަފްވި ދުވަސްވަރު ސަލްމާން އާއިލާއިން އެހީތެރިކަން ލިބުނު ކަމަށާއި އެތައް ފަހަރަކު އެގެއިން ކައިފައިވެސް ވާނެކަމަށް ޝާހްރުކް ޚާން ބުންޏެވެ.

ސަލްމާންއާއި ޝާހްރުކް ޚާން ވަނީ 1995 ވަނަ އަހަރު ނުކުތް ކަރަން އަރުޖުންގައި ވެސް އެކުގައި ފެނިގެން ގޮސްފަ އެވެ. އެހެން ނަމަވެސް އޭގެ ފަހުން އެ ދެމީހުންގެ ގުޅުން ހީނަރުވި އެވެ.