އެކްޓަރަކަށް ވުމުގެ ކުރިން މަދޫރީ ބޭނުންވީ މި ދާއިރާއިން ކުރިއަށް ދާން

ބޮލީވުޑްގައި އަދިވެސް އެންމެ މަގުބޫލު ބަތަލާއިން ތެރޭގައި ހިމެނޭ މަދޫރީ ޑިކްސިޓް އުފަންވެފައި ވަނީ 15 މޭ 1967 ގައި އިންޑިއާގެ މަރާތީ އާއިލާ އަކަށެވެ.

މަދުރީއަކީ ކުޑައިރު ވެސް ނެށުމަށް ޝައުގުވެރިކަން ހުންނަ ފަރާތްތަކަށްވާއިރު ނެށުމުގެ ދާއިރާއިން ވެސް އޭނާ ވަނީ ގިނަ ކާމިޔާބީތަކެއް ހޯދާފަ އެވެ. އޭނާގެ ނެށުމުގެ ހުނަރު އެތަކެއް ފިލްމުތަކުން ފެނިގެން ގޮސްފައިވެ އެވެ.

މަދޫރީ ބޮލީވުޑަށް ތައާރަފްވީ 1984 ވަނަ އަހަރު ނެރުނު "އަދޯދް" ފިލްމުންނެވެ. އެފިލްމަށްފަހު މަދޫރީ ވަނީ ކާމިޔާބު އެތަކެއް ފިލުމެއް ކުޅެފަ އެވެ. ގިނަ އެވޯޑްތަކެއް ވެސް އޭނާ ވަނީ ފިލްމީ ދާއިރާއިން ހޯދާފަ އެވެ.

މަދޫރީ ކުޑައިރު ބޭނުންވީ ފިލްމީ ދާއިރާ ނޫން އެހެން ދާއިރާއަކުން ކުރިއަށްދާށެވެ. އެގޮތުން އޭނާ ވަނީ ޕާލޭ ކޮލެޖުން މަތީ ތައުލީމު ހާސިލު ކުރުމަށްފަހު މައިކްރޯ ބަޔޮލޮޖީ ދާއިރާއިން ޑިގްރީ ހާސިލުކޮށްފަ އެވެ. އަދި މަދޫރީ ބޭނުންވީ މައިކްރޯ ބަޔޮލިޖިސްޓަކަށްވާށެވެ.

މައިކްރޯ ބަޔޮލޮޖީ ދާއިރާއިން މަދޫރީ ފެނިގެން ނުދިޔަ ނަމަވެސް ބޮލީވުޑްގައި އޭނާ އަކީ އެންމެ ކާމިޔާބު އެއް ބަތަލާ އެވެ. އެގޮތުން މަދޫރީ ކުޅެފައިވާ ފާހަގަ ކޮށްލެވޭ ފިލްމުތަކަށް ބަލާއިރު "ދިލް" އާއި "ހަމް އާޕްކޭ ހޭ ކޯން" އާއި "ބޭޓާ" އަދި "ސާޖަން" ހިމެނެ އެވެ.

މަދުރީ ކައިވެނިކޮށްފައިވަނީ 1996 ވަނަ އަހަރު އިންޑިއާގެ މަރާޓީ އާއިލާ އަކަށް ނިސްބަތްވާ އެމެރިކާގެ ރައްޔިތެއްގެ ގޮތުގައި އެތަނުގައި ދިރިއުޅޭ ސްރީރާމް މާދަވް ނާނޭއާ އެވެ.

ކައިވެންޏާ ގުޅިގެން ފިލްމީ ހަޔާތުން ބްރޭކެއް ނެގުމަށްފަހު އޭނާ ދިރިއުޅުނީ ފިރިމީހާއާއެކު އެމެރިކާގަ އެވެ. އެކަމަކު އަނެއްކާ ވެސް 1997 ވަނަ އަހަރު ޔާޝްޗޯޕްރާގެ "ދިލް ތޯ ޕާގަލް ހޭ" އިން ވަނީ ފިލްމީ ދާއިރާއަށް އެނބުރި އައިސްފަ އެވެ.

ފިރިމީހާ އާއި ދެދަރިންނާއެކު 2006 ގައި މުމްބާއީއަށް ބަދަލުވުމަށްފަހު ދިރިއުޅެމުން އަންނަނީ އިންޑިއާގަ އެވެ. އެ ދެމަފިރިންނަށް ލިބިފައި ވަނީ އަރީން (މާޗް 2003)، އަދި (ރަޔާން 2008) އެވެ