އިންޑިއާގެ މޮޑެލް ކުރުމުގެ ދާއިރާއިންނާއި ބައެއް ބޮލީވުޑް ފިލްމުތަކުން އާއްމުންގެ ސަމާލުކަން ހޯދާފައިވާ ތަރި ޕޫނަމް ޕާންޑޭ މަރުވެއްޖެ އެވެ.

ހަބަރުތައް ބުނާ ގޮތުގައި ޕޫނަމް މަރުވެފައިވަނީ ސާވިކަލް ކެންސަރަށް ފަރުވާ ހޯދަމުން ދަނިކޮށް އުމުރުން 32 އަހަރުގައި އިއްޔެގެ ވަގުތެއްގަ އެވެ. އެކަން އޭނާގެ ސެކެޓްރަރީ ވަނީ މީޑިއާއަށް ޔަގީން ކޮށްދީފަ އެވެ.

ޕޫނަމް ބޮލީވުޑަށް ތައާރަފް ވެފައިވަނީ 2013 ވަނަ އަހަރު ނުކުތް ފިލްމު "ނަޝާ"އިންނެވެ. ބޮލީވުޑްގައި މާބޮޑު ކާމިޔާބެއް އޭނާއަށް ލިބިފައި ނުވި ނަމަވެސް މޮޑެލް ކުރުމުގެ ދާއިރާއިން އޭނާ ވަނީ ގިނަ ކާމިޔާބީ ތަކެއް ހޯދާފަ އެވެ.

ޕޫނަމްގެ މަރުގެ ހަބަރު އޭނާގެ އެކައުންޓް މެދުވެރިކޮށް އޭނާގެ މެނޭޖްމަންޓް ޓީމުން އާއްމު ކުރުމުން ގިނަ ބަޔަކު އެކަމާ ހިތާމަ ފާޅުކުރި ނަމަވެސް ބައެއް މީހުން އަންނަނީ އެކައުންޓް ހެކް ކޮށްފައިވާ ކަމަށް ވެސް ބުނަމުންނެވެ.

މޮޑެލް ކުރުމާއި ބޮލީވުޑްގެ ފިޔަވައި ޕޫނަމް ގިނަ ބައެއްގެ މަޝްހޫރުކަން ހޯދާފައިވަނީ ރިއަލިޓީ ޝޯވް "ލޮކްއަޕް"ގެ ބައިވެރިއެއްގެ ގޮތުގަ އެވެ.