2000ގެ އަހަރުތަކުގައި ގިނަ ބައެއްގެ މަގުބޫލުކަން ހޯދި ބޮލީވުޑްގެ އެކްޓްރެސް ޕްރިތީ ޒިންތާ 17 އަހަރަށްފަހު ބޮލީވުޑަށް އެނބުރި އަންނަން ތައްޔާރުވެއްޖެ އެވެ.

ހަބަރުތައް ބުނާ ގޮތުގައި މެދުކެނޑުމަކަށްފަހު ޕްރިތީގެ އެންމެ ފުރަަތަމަ ފިލްމަކަށް ވާނީ "ލާހޯރް 1947" އެވެ. މި ފިލްމަށް އޭނާ ލުކް ޓެސްޓް ވެސް ދީފައިވާ ކަމަށް ބުނެވެ އެވެ.

އެ ފިލްމުގައި ޕްރިތީއާއެކު ފެނިގެންދާނީ ސަނީ ޑިއޯލް އެވެ. އެ ދެމީހުން ވަނީ މީގެ ކުރިން "ދަ ހީރޯ: ލަވް ސްޓޯރީ އޮފް އަ ސްޕައި"، "ފަރްޒް" އަދި "ދިއްލަގީ" ފަދަ ފިލްމުތަކުން އެކުގައި ފެނިގެން ގޮސްފަ އެވެ.

އެންމެ ފަހުން މައި ރޯލަކުން ޕްރިތީ ފެނިގެން ގޮސްފައިވަނީ 2007 ވަނަ އަހަރު ނުކުތް "ޖޫމް ބަރާބަރް ޖޫމް" އިންނެވެ. އޭގެ ފަހުން އައި ދެތިން އަހަރު އޭނާ ބައެއް ފިލްމުތަކުން ހާއްސަ ފެނިލުންތަކުގައި ފެނިގެން ދިޔަ އެވެ.

އެހެން ނަމަވެސް އެމެރިކާގެ ރައްޔިތެއް ކަމަށްވާ ޖީން ގުޑްއިނަފްއާ ކައިވެނި ކުރުމަށްފަހު އެމެރިކާއަށް ދިރިއުޅުން ބަދަލުކުރި ފަހުން އޭނާ ވަނީ ބޮލީވުޑުން އެއްކޮށް ގެއްލިފަ އެވެ.