ލޯބީގެ ގުޅުމެއްގައި ފެންނަ އިންޒާރުގެ ނިޝާންތައް ނުވަތަ "ރެޑް ފްލެގްސް"އާ ބެހޭ ގޮތުން ބޮލީވުޑްގެ ވެޓެރަން އެކްޓަރު ޖާޔާ ބައްޗަން ވާހަކަ ދައްކައިފި އެވެ.

ޖާޔާ މި ބީދައިން ވާހަކަ ދައްކާފައި ވަނީ އޭނާގެ މާމަ ދަރިފުޅު ނަވްޔާ ނަންދާގެ ޔޫޓިއުބް ޗެނަލް މެދުވެރިކޮށް ގެނެސްދޭ "ވަޓް ދަ ހެލް ނާވްޔާ" ޕްރޮގްރާމްގަ އެވެ.

ޖާޔާގެ އިތުރުން ނަވްޔާއާއި އޭނާގެ މަންމަ ޝްވެތާ ބައްޗަން ވެސް ބައިވެރިވި އެ ޕްރޮގްރާމްގައި ވާހަކަ ދެއްކި މައުޟޫއަކީ "ލޯބި" އެވެ.

ޖާޔާ ބުނުމަކީ ގުޅުމެއްގައި އެކަކު އަނެކަކަށް އިހުތިރާމް ކުރުމަކީ ވަރަށް މުހިއްމު ކަމެއް ކަމަށާއި އެ އިހުތިރާމު ނުފެނުމަކީ ބޮޑު "ރެޑް ފްލެގް" އެއް ކަމަށެވެ.

އޭގެ އިތުރުން ޖާޔާ ވަނީ ދުވަހަކުވެސް އޭނާގެ ފިރިމީހާ އަމީތާބު ބައްޗަންއަށް "ކަލޭ" ކިޔައިގެން ވާހަކަ ދައްކާފައި ނުވާނެ ކަމަށް ވެސް ބުނެފަ އެވެ.

ޖާޔާއާއި އަމީތާބްއަކީ ބޮލީވުޑްގައި މިވަގުތު ހަރަކާތްތެރިވާ އެންމެ ފުންނާބު އުސް ވެޓެރަން ޖޯޑެވެ. އެމީހުންގެ ކައިވެންޏަކީ ވެސް ކާމިޔާބު ކައިވެންޏެއްގެ ގޮތުގައި ގިނަ ބަޔަކު ސިފަކުރެ އެވެ.