ރާއްޖޭގެ ތާރީހުގައި ފުރަތަމަ ފަހަރަށް އަތޮޅު ކައުންސިލެއްގެ ރައީސަކަށް އަންހެން ބޭފުޅަކު އިންތިހާބުކޮށްފި އެވެ.

ރާއްޖޭގެ ފުރަތަމަ އަތޮޅު ކައުންސިލެއްގެ ރައީސަކަށް އިންތިހާބުކޮށްފައި ވަނީ ފ. އަތޮޅު ކައުންސިލްގެ ބައި އިލެކްޝަން ކާމިޔާބު ކުރެއްވި ވެރިކަން ކުރާ މައި ޕާޓީ، ޕީއެންސީގެ ކެންޑިޑޭޓު ހައްވާ އަބްދުލް އަޒީޒެވެ.

އޭނާ ބައި އިލެކްޝަން ކާމިޔާބު ކުރެއްވީ 941 ވޯޓު ހޯއްދަވައިގެންނެވެ. އެމްޑީޕީގެ ކެންޑިޑޭޓަށް ލިބުނީ 887 ވޯޓެވެ.

ފ. އަތޮޅު ކައުންސިލްގެ ރައީސަކަށް އިންތިހާބު ކުރުމަށް ބައި އިލެކްޝަނެއް ބޭއްވި އިރު، ވ.ފެލިދޫ ކައުންސިލްގެ ރައީސާއި, ރަސްގަތީމު އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ގޮނޑީގެ ބައި އިލެކްޝަންގެ ވޯޓްލުން ކުރިޔަށް ގޮސްފަ އެވެ. މި ގޮނޑިތަކުގެ ތެރެއިން ފެލިދޫ ކައުންސިލްގެ ރައީސްގެ ގޮނޑިއަށް އިންތިހާބުވީ ޕީއެންސީގެ ކެންޑިޑޭޓެކެވެ. އޭނާ ވާދަކުރެއްވީ އަމިއްލަ ގޮތުން ވާދަކުރެއްވި ކެންޑިޑޭޓަކާ އެވެ.

ރަސްގެތީމު ދާއިރާގެ އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ ގޮނޑި ނެގީ ކޮންގްރެސް ޕާޓީއާ ވާދަކޮށް އެމްޑީޕީންނެވެ.