ރަންބީރު ކަޕޫރަކީ ބޮލީވުޑްގެ އެންމެ މަގުބޫލު ތަރިންގެ ތެރޭގައި ހިމެނޭ ތަރިއެއް ނަމަވެސް އޭނާއަކީ އާއްމުކޮށް ސޯޝަލް މީޑިއާ ބޭނުންކުރާ ތަރިއެއް ނޫނެވެ.

އެހެން ނަމަވެސް އެހެން މީހުންނަށް ޖާސޫސް ކުރަން އޭނާ ސިއްރު އެކައުންޓްތަކެއް ގެންގުޅޭ ކަމަށް ދެބެންގެ ދެދަރި ކަރީނާ ބުނެފައިވާއިރު އަންހެނުން އާލިއާ ވެސް ވަނީ އެކަހަލަ ކަމަކަށް އިޝާރާތް ކޮށްފަ އެވެ.

އެންމެ ފަހުން އިންޓަނެޓު ބޭނުންކުރާ ފަރާތްތަކުން މިވަނީ ރަންބީރުގެ "ސިއްރު" ސޯޝަލް މީޑއާ އެކައުންޓް ހޯދާފަ އެވެ. އެއީ ރޭމާ1528 ގެ ނަމުގައި ހަދާފައިވާ އެކައުންޓެކެވެ.

އާއްމުން ގަބޫލުކުރާ ގޮތުގައި ރޭމާއަކީ ރަންބީރުގެ ނަމާއި އޭނާ ސަޕޯޓުކުރާ ފުޓްބޯޅަ ތަރިއެއް ކަމަށްވާ ނޭމާގެ ނަން އެއްކޮށް ހަދާފައިވާ ނަމެކެވެ. އެއާއެކު 1528 އަކީ ރަންބީރާއި އާލިއާގެ އުފަން ތާރީހު ކަމަށް ވެސް މީހުން ބުނެ އެވެ.

މި އެކައުންޓުން ކޮށްފައިވާ ޓްވީޓްތަކަށް ބަލާއިރު އަހަރުތަކެއް ކުރިން މާހިރާ ޚާންގެ ޕޯސްޓުތަކަކަށް ކޮށްފައިވާ ކޮމެންޓްތަކަކުން އެއީ ރަންބީރު ކަމަށް ދެކެވޭ ވާހަކައަށް އިތުރު ބާރެއް ލިބޭ ކަމަށް ވެސް މީހުން ބުނެ އެވެ.

މިކަމާ ބެހޭ ގޮތުން ރަންބީރުގެ ރަސްމީ ބަހެއް އަދި މިހާތަނަށް މީޑިއާއަށް ލިބިފައެއް ނުވެ އެވެ.