މަޝްހޫރު އިކިއާއަކީ ދުނިޔޭގެ އެންމެ މަޝްހޫރު އެއް ބްރޭންޑެކެވެ. އިކިއާގެ ފަރުނީޗަރާއި ގޭތެރޭގައި ބޭނުންކުރާ އުފެއްދުންތައް އެހާމެ ތަފާތެވެ. ރީއްޗެވެ. މި މަގުބޫލް މަޝްހޫރު ބްރޭންޑްގެ ބާނީ ސްވިޑަންގެ އިންގްވާރް ކެމްޕްރާޑްއަކީ އެހެން ވިޔަފާރިވެރިންނާ ޚިލާފަށް ވަރަށް ޚަރަދުކުޑަ ދިރިއުޅުމަކަށް ލޯބިކުރި މީހެކެވެ. ބައެއް މީހުން ދެކޭ ގޮތުގައި އޭނާއަކީ ދުނިޔެ ދުށް އެންމެ ދަހި މީހުންގެ ތެރޭގައި ހިމެނޭ އެކަކެވެ.

އުމުރުން އެންމެ ފަސް އަހަރުގައި އަވަށްޓެރިންނަށް އަލިފާން ދަނޑި ވިއްކި އިންގްވާރް ބޮޑުވަމުން އައިވަރަކަށް ވިޔަފާރިއަށް ޝައުގުވެރިވެ، ދުރު ތަންތަނަށް ދަތުރުކޮށް، ތަފާތު ސާމާނު ވިއްކައިގެން ފައިދާ ހޯދަން ފެށި އެވެ. އުމުރުން 17 އަހަރުގައި ބައްޕަ ދިން ފައިސާކޮޅެއް ބޭނުންކޮށްގެން، އިކިއާގެ ނަމުގައި ފަރުނީޗަރުގެ ވިޔަފާރި ފެށި އެވެ. މި ވިޔަފާރިވީ މީހުންގެ ތެރޭއި ވަރަށް މަގުބޫލު ވިޔަފާރިއަކަށެވެ.

ކިތަންމެ މުއްސަނދި ވިޔަފާރިވެރިއެއް ނަމަވެސް އޭނާ އަބަދުވެސް ދަތުރުކޮށް އުޅުނީ އިކޮނޮމީ ކްލާހުގަ އެވެ. ދަތުރުތަކުގައި މަޑުކުރާ ހޮޓާތަކަކީ ވަރަށް އާދައިގެ އަގުހެޔޮ ހޮޓާތަކެވެ. ބޯކޮށާއި އުޅުނީ ފަގީރު ގައުމުތަކުގެ ސެލޫންތަކުންނެވެ. ގެންގުޅުނީ 20 އަހަރުވެފައިވާ ބާ ކާރެކެވެ. ޕަބްލިކް ޓްރާންސްޕޯޓް ބޭނުންކުރުމަކީ ވެސް އިންގްވާރްގެ އާދައެކެވެ. އެއް ފަހަރަކު ބަހެއްގައި ދަތުރުކޮށްފައި އޭނާއަށް ބިޒްނަސް މޭން އޮފް ދަ އިޔާ އެވޯޑް ލިބޭ ހަފުލާއަށް ދިއުމުން ވަނުން ވެސް މަނާކުރި އެވެ.

އިންގްވާރް ކައި އުޅެނީ އަގުހެޔޮ ތަންތަން ބަލައިގެންނެވެ. ކަނީ އަބަދުވެސް އެއް ކެއުމެކެވެ. އެއީ މީޓް ބޯލްސް، މޭޝްޑް ޕޮޓޭޓޯ އަދި ލިންގޮން ބެރީ ޖޭމް އެވެ. ކާންދާއިރު އަމިއްލަ ލޮނު ޕެކެޓާއި، އަސޭމިރުސް ޕެކެޓް ގެންދެ އެވެ. އަދި ސައިފަތް ޕެކެޓް ދެ ފަހަރަށް ބޭނުން ކުރެ އެވެ. ތަރުކާރީ ގަނެ ހަދަނީ އަގުހެޔޮ ވަގުތުތައް ބަލައިގެންނެވެ.

މީގެ ހަ އަހަރު ކުރިން 2018 ވަނަ އަހަރު އުމުރުން 91 އަހަރުގައި ނިއުމޯނިއާ ޖެހިގެން އޭނާ މަރުވިއިރު އިންގްވާރްގެ މިލްކިޔާތުގައި 58 ބިލިއަން ޑޮލަރު ހުރި ނަމަވެސް އާއިލާއަށް އެއްކޮށް ދިނުމުގެ ބަދަލުގައި އެއިން ދެބައިކުޅަ އެއްބައި ހޭދަކުރުމަށް ވަސިއްޔަތް ކުރީ ސްވިޑަންގެ ކުދި ވިޔަފާރިތަކަށެވެ. މިއީ ދުނިޔެ ދުށް އެންމެ ދަހި ސާދާގަރު [ވިޔާފާރިވެރިޔާ] ކަމަށްވުން އެކަށީގެންވެ އެވެ.