ރައްޔިތުންގެ މަޖިލީހުގެ ތިނަދޫ ދެކުނު ދާއިރާއަށް އަމިއްލަގޮތުން އިންތިހާބުވި މުހައްމަދު އަލްސަން އަހްމަދާ ރައީސް ޑރ. މުހައްމަދު މުއިއްޒު ބައްދަލުކުރައްވައިފި އެވެ.

އަލްސަން އެކްސްގައި ވިދާޅުވީ ރައީސާ ބައްދަލުކުރެއްވީ ތިނަދޫގެ ތަރައްގީއާ ގުޅޭ ވާހަކަތައް ދެއްކުމަށް ކަމަށެވެ. އެގޮތުން ތިނަދޫއަށް އަދަށް ވުރެން ފަހި މާދަމާއެއް ހޯދުމަށް ރައްޔިތުން އޭނާ ކުރެއްވި އިތުބާރު ނަގަހައްޓައި، ރައްޔިތުން އެދޭ ބަދަލު ދާއިރާއަށް ގެނައުމަށްޓަކައި އޭނާގެ ފުރިހަމަ އެއްބާރުލުން ލިބޭނެކަން ރައީސް މުއިއްޒުގެ އަރިހުގައި ދެންނެވި ކަމަށް އަލްސަން ވިދާޅުވި އެވެ.

އަލްސަން އަކީ 20 ވަނަ ރައްޔިތުންގެ މަޖިލީހަށް އިންތިހާބުވި އެންމެ ޒުވާން މެމްބަރެވެ. ވެރިކަންކުރާ ޕީއެންސީން ވަނީ މަޖިލީހުގެ ސުޕަ މެޖޯރިޓީ ނަގާފަ އެވެ.

ސަރުކާރާ ކޯލިޝަން ހަދާފައިވާ ޕާޓީތަކުގެ މެމްބަރުންނާއެކު ސަރުކާރަށް ތާއީދު ކުރާ މެމްބަރުންގެ އަދަދު 76 އަށް ވުރެ ގިނަ އެވެ.

މިދިޔަ މަޖިލިސް އިންތިހާބުގައި އެމްޑީޕީއަށް ލިބުނީ އެންމެ 12 ގޮނޑި އެވެ.