ބޮލީވުޑް ތަރި ކާތިކް އާރްޔަންގެ އެންމެ ފަހުގެ ފިލްމު "ޗަންދޫ ޗެމްޕިއަން" ރިލީޒް ކުރެވުނީ ޖޫން މަހުގެ 14 ވަނަ ދުވަހު އީދާ ގުޅުވައިގެންނެވެ. އެހެން ނަމަވެސް އާއްމުންގެ ފަރާތުން އެ ފިލްމަށް ލިބެމުން އަންނަނީ ފިނި ތަރުހީބެއް ކަމަށް ހަބަރުތައް ބުނެ އެވެ.

އެގޮތުން ފިލްމު އެޅުވި ފުރަތަމަ ދުވަހު އެ ފިލްމަށް ބޮކްސް އޮފީހުގައި ލިބިފައިވަނީ އެންމެ ހަތަރު ކްރޯޑް ރުޕީސް އެވެ.

ފިލްމުގެ ޓިކެޓްތައް 150 ރުޕީސްގެ އަގުހެޔޮ އަގަކަށް ވިއްކި ނަމަވެސް އެންމެ ފުރަތަމަ ދުވަހުގެ އޮކިއުޕަންސީ ވެސް އުޅުނީ 16 ޕަސަންޓްގަ އެވެ. މިއީ މިދިޔަ 10 އަހަރު ތެރޭގައި ވެސް ކާތިކްގެ ފިލްމަކަށް ފުރަތަމަ ދުވަހު ލިބުނު އެންމެ ދަށް އާމްދަނީ ކަމަށް ތަފާސްހިސާބުތަކުން ދައްކަ އެވެ.

އާއްމުކޮށް އިންޑިއާގައި އީދު ބަންދާ ދިމާކޮށް އަޅުވާ ފިލްމުތަކަށް ހޫނު ތަރުހީބެއް ލިބެ އެވެ. އެގޮތުން އީދު ފާހަގަ ކުރެވެނީ ގިނަފަހަރަށް ސަލްމާން ޚާންގެ ފިލްމުތައް އަޅުވާ ދުވަސްވަރެއްގެ ގޮތުގަ އެވެ.

އިންޑިއާގެ އެންމެ ފުރަތަމަ ޕެރަލިމްޕިކް ގޯލްޑް މެޑަލިސްޓް މުރްލީކާންތު ޕޭޓްކެރްގެ ހަޔާތުގެ މައްޗަށް ބިނާކޮށް އުފައްދާފައިވާ "ޗަންދޫ ޗެމްޕިއަން" ޑައިރެކްޓް ކޮށްފައިވަނީ ކަބީރު ޚާން އެވެ.