ޕިކްސާގެ އެނިމޭޓަޑް ފިލްމު "އިންސައިޑް އައުޓް 2" އަށް ބޮކްސް އޮފީހުގައި ކާމިޔާބު ފެށުމެއް ލިބޭނެ ކަމަށް ފޯކާސްޓްތަކުން ދައްކައިފި އެވެ.

މިދިޔަ ބުރާސްފަތި ދުވަހު އެޅުވި އެ ފިލްމުގެ ފުރަތަމަ ޝޯތަކުން އެކަނި ވެސް 13 މިލިއަން ޑޮލަރުގެ އާމްދަނީ އެއް ލިބިފައިވެ އެވެ.

އެއާއެކު އުތުރު އެމެރިކާގައި އަޅުވާ ފުރުތަމަ ޝޯއާއެކު ވެސް ބޮކްސްއޮފީހުގައި ގާތްގަނޑަކަށް 130 މިލިއަން ޑޮލަރު ލިބޭނެ ކަމަށް އަންދާޒާ ކުރެވެ އެވެ.

ބޮކްސް އޮފީހުގެ ތާރީހުގައި ވެސް އެނިމޭޓަޑް ފިލްމަކަށް އެންމެ ބޮޑު އާމްދަނީއެއް ލިބިފައިވަނީ ހަމަ ޕިކްސާގެ އުފެއްދުމެއް ކަމަށްވާ "އިންކްރެޑިބަލްސް 2" އަށެވެ.

އާމްދަނީގެ އިތުރުން ފާޑުކިޔުންތެރިންގެ ފަރާތުން ލިބޭ ރިވިއުސްގެ ގޮތުން ވެސް "އިންސައިޑް އައުޓް 2"އަށް އަންނަނީ ވަރަށް ބޮޑު ކާމިޔާބީތައް ލިބެމުންނެވެ.

ފިލްމު ރޭޓު ކުރާ ވެބްސައިޓެއް ކަމަށްވާ ރޮޓަން ޓޮމާޓޯސްގައި ކްރިޓިކްސްގެ ފަރާތުން އެ ފިލްމަށް ލިބިފައިވަނީ 93 ޕަސެންޓްގެ ސްކޯ އެކެވެ. އާއްމުން ދީފައިވަނީ 95 ޕަސެންޓް އެވެ.