ސޮނާލީ ބެންޑްރޭއަކީ 1990ގެ އަހަރުތަކުގައި އާއްމުންގެ މެދުގައި މަގުބޫލުވި އެކްޓަރެކެވެ. އެ ދުވަސްވަރު އޭނާއަށް ސަޕޯޓުކުރާ މީހުންގެ އަދަދު އިންތިހާއަށް ގިނަ އެވެ.

އެގޮތުން ސޮނާލީއާ ބައްދަލުކުރަން ވެސް އެ ދުވަސްވަރު އެތައް ބަޔަކު ވަނީ މަސައްކަތް ކޮށްފަ އެވެ. އެހެން ނަމަވެސް އެކަން ނާކާމިޔާބު ވުމުން އަމިއްލަ ފުރާނަ ގެއްލުވާލި މީހެއްގެ ވާހަކަ މިހާރު ވަނީ ފެންމަތިވެފަ އެވެ.

ދާދި ފަހުން ސޮނާލީ ދިން އިންޓަވިއުއެއްގައި އެހާދިސާއާ ބެހޭ ގޮތުން ސުވާލު ކުރެވެމުން އޭނާ ބުނީ އެފަދަ ކަމެއް ހިނގިކަން އޭނާއަށް ނޭނގޭ ކަމަށެވެ.

ސަޕޯޓަރުންގެ ފަރާތުން ލިބޭ ތަރުހީބާ ބެހޭ ގޮތުން ވާހަކަ ދައްކަމުން ސޮނާލީ ބުނީ މަޝްހޫރު މީހަކަށް ސަޕޯޓު ކުރުމުގައި ހައްދު ފަހަނައަޅައި ދިއުމަކީ އޭނާއަށް ގަބޫލު ކުރެވޭ ކަމެއް ނޫން ކަމަށެވެ.

ނުވަދިހައިގެ އަހަރުތަކުގައި ސޮނާލީ ފެނިގެންދިޔަ މަޝްހޫރު ފިލްމުތަކުގެ ތެރޭގައި "ދިލްޖަލޭ"، "ޑުޕްލިކޭޓް" އަދި "ސަރްފަރޯޝް" ފަދަ ފިލްމުތައް ހިމެނެ އެވެ.

މީގެ އަހަރުތަކެއް ކުރިން އޭނާއަށް ކެންސަރު ޖެހި އެ ބައްޔަށް ފަރުވާ ހޯދުމަށްފަހު މިހާރު ވަނީ ބަލިން ސަލާމަތްވެފައިކަން ވެސް ފާހަގަ ކުރެވެ އެވެ.