ވޯލްޑް ކަޕްގެ ސެމީ ފައިނަލްގައި އާޖެންޓީނާ އަތުން އިނގިރޭސިން ބަލިވިތާ ކުޑަވަގުތުކޮޅެއްގެ ތެރޭގައި، އިނގިރޭސި އަސްކަރީ މަނަވަރަކުން އާޖެންޓީނާގެ ކަނޑުގެ ސަރަހައްދަށް ގާނޫނާ ހިލާފަށް ވަދެފައިވާ ކަމުގެ ސީރިއަސް ތުހުމަތުތަކެއް އެ ގައުމުން ކޮށްފި އެވެ.

އާޖެންޓީނާގެ ފޮރިން މިނިސްޓަރު ޕަބްލޯ ކިއުރްނޯ ނެރުއްވި ބަޔާނެއްގައި، އިނގިރޭސި ރޯޔަލް ނޭވީގެ "އެޗްއެމްއެސް މެޑްވޭ" މަނަވަރު އެ ގައުމުގެ ސަރަހައްދަށް ވަދެފައިވަނީ އެއްވެސް ހުއްދައެއް ނުވަތަ އެންގުމަކާ ނުލައި ކަމަށް ބުނެ، އިނގިރޭސި އެމްބަސީއަށް ވަނީ ރަސްމީކޮށް ޝަކުވާ ހުށަހަޅާފަ އެވެ. ނަމަވެސް އިނގިރޭސިވިލާތުން މި ތުހުމަތުތައް ދޮގުކުރެއެވެ. އިނގިރޭސި ސަރުކާރުން ބުނިގޮތުގައި، އެ މަނަވަރަކީ އެންޓާކްޓިކާގެ ސައިންޓިފިކް މިޝަނަކަށް ބޭނުންވާ ސާމާނު ހިފައިގެން ޗިލީއަށް ދަތުރުކުރި އުޅަނދެއް ކަމަށާއި، އެ ދަތުރުގެ މައުލޫމާތު ކުރިއާލާ އާޖެންޓީނާއާ ހިއްސާކޮށްފައިވާނެ ކަމަށެވެ.

މި ސިޔާސީ ނުތަނަވަސްކަން އުފެދުނީ، ސެމީ ފައިނަލުގައި އިނގިރޭސިން ބަލިކުރުމަށްފަހު، ފޯކްލޭންޑް ޖަޒީރާއަކީ އާޖެންޓީނާގެ މިލްކެއް ކަމަށް ބުނާ ބެނާއެއް ހިފައިގެން އާޖެންޓީނާގެ ކުޅުންތެރިން އުފާފާޅުކުރުމާ ގުޅިގެންނެވެ. މީގެ އިތުރުން އާޖެންޓީނާގެ ނައިބު ރައީސާ ވިކްޓޯރިއާ ވިލަރޫއެލް ވެސް ވަނީ އިނގިރޭސިންނަށް ވަރަށް ބޮޑަށް ފާޑުވިދާޅުވެފަ އެވެ.

އިނގިރޭސި ސަރުކާރުން މިކަން ސިފަކުރީ ފުޓްބޯޅައިގެ ތެރެއަށް ސިޔާސީ ކަންކަން ވެއްދުން ކަމަށާއި، މި މައްސަލަ ފީފާއިން ބަލަންޖެހޭނެ ކަމަށް ވަނީ ބުނެފަ އެވެ. ފީފާގެ ގަވާއިދުތައް ބުނާގޮތުން ދަނޑުމަތީގައި ސިޔާސީ މެސެޖުތައް ދިނުމަކީ މަނާކަމަކަށްވާތީ، އާޖެންޓީނާއަށް ފީފާގެ ފަރާތުން ހަރުކަށި އަދަބެއް ލިބުމުގެ ފުރުސަތު އެބައޮތެވެ. 1982 ވަނަ އަހަރުގެ ފޯކްލޭންޑް ހަނގުރާމައަށްފަހު، މި ޖަޒީރާގެ މިލްކުވެރިކަމާ މެދު ދެ ގައުމުގެ ދެމެދުގައި އަދިވެސް ދަނީ ބޮޑެތި އިހްތިލާފުތަކެއް ހިނގަމުންނެވެ.