ޕްރިޔަންކާ ޗޯޕްރާއަކީ އޭނާގެ މަސައްކަތަށް އަބަދުވެސް ވަަރަށް ފަރުވާތެރިވާ "ޕްރޮފެޝަނަލް" އެކްޓަރެއް ކަމުގައި ޑައިރެކްޓަރުން ބުނެ އެވެ. ފިލްމަކަށް ކުރަން ޖެހޭ ކޮންމެ ކަމެއް އޭނާ ކުރެ އެވެ.

އެގޮތުން ދާދި ފަހުން އޭނާ ކުރި އެފަދަ ކަމެއްގެ ތެރެއިން މިފަހަރު ޕްރިޔަންކާއަށް މިވަނީ ކޮންމެ ވެސް ވަރެއްގެ އަނިޔާއެއް ވެސް ލިބިފަ އެވެ.

ހޮލީވުޑްގެ ކުރިއަށް އޮތް ފިލްމެއް ކަމަށްވާ "ދަ ބުލް"ގެ ޝޫޓިންގެ ތެރެއިން ޕްރިޔަންކާއަށް ވަނީ އަނިޔާވެފައި ކަމަށް ހަބަރުތައް ބުނެ އެވެ.

އެކްޝަން މަންޒަރެއްގެ ޝޫޓިން ނެގުމުގެ ތެރޭގައި ޕްރިޔަންކާއަށް އަނިޔާވި އިރު އޭނާ ވަނީ އެކަން އިންސްޓަގުރާމްގައި ވެސް ހިއްސާކޮށްފަ އެވެ.

އެގޮތުން ޕްރިޔަންކާ ހިއްސާކުރި ފޮޓޯގައި ފެންނަނީ ޕްރިޔަންކާގެ ފައިގެ ބައެއް ތަންތަން މަށައިގެން ގޮސް ލޭ އައިސްފައިހުރި މަންޒަރެވެ.

އެ ޕޯސްޓާއެކު ގިނަ ބަޔަކު އަންނަނީ ޕްރިޔަންކާގެ މަސައްކަތުގެ ފަރުވާތެރި ކަމާއި ކުރާ ހިތްވަރަށް ސާބަސްދީ ތައުރީފް ކުރަމުންނެވެ.