މަސްތުގެ ހާލަތުގައި އެއްގަމު އުޅަނދު ދުއްވުމުގެ މައްސަލައެއްގައި މަޝްހޫރު ލަވަކިޔުންތެރިޔާ ޖަސްޓިން ޓިމްބަލޭކް ހައްޔަރު ކޮށްފި އެވެ.

މިދިޔަ އަންގާރަ ދުވަހު ހިނގި އެ ހާދިސާގައި ޓްރެފިކް ފުލުހުން ވަނީ ޖަސްޓިން ދުއްވަން އިން ކާރު ހިފަހައްޓައި އޭނާއާ ސުވާލުކޮށްފަ އެވެ. އެގޮތުން ކުރެވުނު ސުވާލުތަކާއި ހެދުނު ޓެސްޓުތަކުން ޖަސްޓިން ފެއިލްވެ، އެ ވަގުތު އޭނާ އިނީ މަސްތުގެ ހާލަތުގައި ކަން ވަނީ ސާބިތުވެފަ އެވެ.

އެހެން ނަމަވެސް އަމިއްލަ ނަފްސު ދިފާއު ކުރަމުން ޖަސްޓިން ބުނެފައި ވަނީ އޭނާ ކާރު ދުއްވުމުގެ ކުރިން ބޮއެފައި ވަނީ އެންމެ "މާޓިނީ"އެއް ކަމަށާއި އެއިން މާ ބޮޑު އަސަރެއް ނުކުރާނެ ކަމަށެވެ.

ހަމައެއާއެކު ޖަސްޓިންއަށް ކުރެވިފައި ވަނީ އެއްވެސް އަސާސެއް ނަތް ތުހުމަތުތަކެއް ކަމަށާއި އެ ތުހުމަތުތަކުން ސަލާމަތްވާން އޭނާއަށް އެހީވާނެ ކަމަށް ޖަސްޓިންގެ ވަކީލު ބުނެފައިވެ އެވެ.

މި މައްސަލައިގެ އަޑު އެހުން އަންނަ މަހުގެ 26 ވަނަ ދުވަހަށް ތާވަލު ކުރެވިފައިވާއިރު އޭނާ މިވަގުތު ހުރީ ކަފާލާތުގެ ދަށުން މިނިވަންވެފައި ކަމަށް ހަބަރުތައް ބުނެ އެވެ.