މިއަހަރު ބޮލީވުޑަށް ނުކުންނަ އާ ތަރިންގެ ތެރެއިން އެ ތަރިއެއްގެ ފިލްމަށް އެންމެ ގިނަ ބަޔަކު އިންތިޒާރުކުރި އެއް ތަރިއަކީ ބޮލީވުޑްގެ މަޝްހޫރު އެކްޓަރު އާމިރު ޚާންގެ ދަރިފުޅު ޖުނައިދު ޚާން އެވެ.

ޖުނައިދުގެ ފުރަތަމަ ފިލްމު "މަހާރާޖާ"ގެ ފުރަތަމަ ފެނިލުމާއެކު ވެސް ގިނަ ބައެއްގެ ސަމާލުކަން އޭނާގެ ބޮލީވުޑް ފެށުމަށް ހުއްޓުނެވެ.

ގާނޫނީ ގޮންޖެހުންތަކަކުން އަރައިގަތުމަށްފަހު އެ ފިލްމު އެންމެ ފަހުން ވަނީ މީގެ ދެ ދުވަސް ކުރިން އޯޓީޓީ ޕްލެޓްފޯމްގައި ރިލީޒް ކޮށްފަ އެވެ. އެއާއެކު ގިނަ ބަޔަކު އަންނަނީ އެ ފިލްމު ބަލައި އޭގައި ޖުނައިދު ދައްކާފައިވާ އެކްޓިންއަށާއި އޭނާގެ ހުނަރަށް ސާބަސްދީ ތައުރީފް ކުރަމުންނެވެ.

ހަމައެއާއެކު ފާޑުކިޔުންތެރިންގެ ފަރާތުން ވެސް އެ ފިލްމަށް ލިބެމުން އަންނަނީ ޕޮޒިޓިވް ރިވިއުސްތަކެކެވެ. ފިލްމުގެ އެކްޓިންއާއި ޓެކްނިކަލް ކަންކަން ވެސް އެމީހުން ފާހަގަކުރެ އެވެ.

އާމިރު ޚާންގެ އިތުރުން ވެސް 90ގެ އަހަރުތަކުގައި ވިދާލި ބޮލީވުޑް ތަރިންގެ ދަރިން މިހާރު އަންނަނީ ބޮލީވުޑަށް ނުކުންނަމުންނެވެ.

އޭގެ ތެރޭގައި ޝާހްރުކް ޚާންގެ ދަރިން ކަމަށްވާ އާރްޔަންއާއި ސުހާނާ، ސައިފް އަލީ ޚާންގެ ދަރިން ސާރާއާއި އިބްރާހީމް ފާހަގަކުރެވެ އެވެ.