ސަރުކާރުގެ ޚަރަދުތައް ހަމަޖައްސުމަށް އަންނަ އާދިއްތަ ދުވަހުން ފެށިގެން ޓްރެޜަރީ ބިލް (ޓީ-ބިލް) ވިއްކަން ހުޅުވާލުމަށް ފިނޭންސް މިނިސްޓްރީން ނިންމައިފި އެވެ.

ފިނޭންސް މިނިސްޓްރީން ހުޅުވާލަނީ ޖުމްލަ 1.2 ބިލިޔަން ރުފިޔާގެ 4 ޓީ- ބިލެއް ވިއްކުމަށެވެ.

ޓީ- ބިލްތަކުގެ ތަފްސީލް:

  • 28 ދުވަހުން އަނބުރާ ދެއްކުމަށް ވިއްކާ 200 މިލިޔަން ރުފިޔާގެ ޓީ- ބިލް
  • 98 ދުވަހުން އަނބުރާ ދެއްކުމަށް ވިއްކާ 120 މިލިޔަން ރުފިޔާގެ ޓީ- ބިލް
  • 182 ދުވަހުން އަނބުރާ ދެއްކުމަށް ވިއްކާ 687 މިލިޔަން ރުފިޔާގެ ޓީ-ބިލް
  • 364 ދުވަހުން އަނބުރާ ދެއްކުމަށް ވިއްކާ 202 މިލިޔަން ރުފިޔާގެ ޓީ- ބިލް

ޓީ- ބިލްތަކުގެ އިންޓްރެސްޓް ރޭޓް އުޅެނީ 3.50 އިންސައްތައާއި 4.60 އިންސައްތައާ ދެމެދު އެވެ.

ޓީ- ބިލަކީ ބަޖެޓްގެ ދަރަނި ފޫބެއްދުމަށް ވިއްކާ ދައުލަތުގެ ދަރަންޏެކެވެ. ޓީ- ބިލް ވިއްކަނީ އޭގެ އަސްލު އަގަށް ވުރެ ހެޔޮކޮށް، އަދި ކަނޑައެޅިފައިވާ މުއްދަތެއް ހަމަވުމުން، އޭގެ ފައިސާ އަނބުރާ ދައުލަތުން އެފަރާތަކަށް އޭގެ އަސްލު އަގު އަދާކުރާ ގޮތަށެވެ. މީގެ ސަބަބުން ޓީ- ބިލަށް އިންވެސްޓްކުރާ ފަރާތްތަކަށް ފައިދާ ލިބެ އެވެ.

ރާއްޖޭގައި މިހާރު ޓީ- ބިލްގައި އިންވެސްޓްކުރަނީ ބޭންކްތަކާއި، ޕަބްލިކް ކުންފުނިތަކާއި، ޕެންޝަން އޮފީހުގެ އިތުރުން އަމިއްލަ ކުންފުނިތަކުންނެވެ.