ފެނަކައިގެ ކުރީގެ ވެރިންނާ ގުޅޭ ހިޔާނާތުގެ 25 މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅާފައިވާ ކަމަށް އެ ކުންފުނީގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ވިދާޅުވެއްޖެ އެވެ.

މުއާޒް މިހެން ވިދާޅުވެފައިވަނީ އެސްއެސްޓީވީގެ ޕްރޮގްރާމެއްގައި ވާހަކަ ދައްކަވަމުންނެވެ.

މުއާޒް ވިދާޅުވީ ކޮރަޕްޝަން ހިންގާފައިވަނީ އެކިއެކި ޕްރޮޖެކްޓްތައް ހިނގުމުގެ ނަމުގައި ކަމަށެވެ. އެގޮތުން ކޮންސްޓްރަކްޝަން ޕްރޮޖެކްޓްތަކުން ބޮޑެތި އަދަދުތަކުން ހިޔާނާތްތެރިވެފައިވާކަން އޭނާ ފާހަގަ ކުރެއްވި އެވެ.

"ކުންފުންޏަށް ގެއްލުންވާގޮތަށް ހިންގާފައިވާ ގިނަ ޕްރޮޖެކްޓްތަކެއްގައި ކޮރަޕްޝަން ހިމެނޭ. އަޅުގަނޑުމެން އޭސީސީއަށް ހުށަހަޅާފައިވާނީ ކަނޑައެޅިގެން ކުންފުންޏަށް ގެއްލުންވާގޮތަށް، ކުންފުނީގެ ޕޮލިސީތަކާ ހިލާފަށް ނާޖާއިޒް މަންފާ ލިބޭނެގޮތަށް ކޮށްފައި ހުރި ކަންކަން،" މުއާޒް ވިދާޅުވި އެވެ.

ފެނަކައާ ހަވާލުވިއިރު 4.3 ބިލިއަން ރުފިޔާ ދަރަނި އޮތް ކަމަށާއި މި އަދަދު އެއަށްވުރެންވެސް އިތުރު ވާނެކަމަށް ބެލެވޭކަމަށް އޭނާ ވިދާޅުވި އެވެ. ކުރީގެ ވެރިން ހިންގާފައިހުރި ހިޔާނާތްތަކުގެ ތެރެއިން ބައެއް ކަންކަމުގައި އެއްވެސް ލިޔެކިޔުމެއް ނެތް ކަން އޭނާ ފާހަގަ ކުރެއްވި އެވެ. ދަރަނީގެ ގޮތުގައި އެސްޓީއޯ އިން ނަގާފައިވާ ތެލަށް އެކަނިވެސް ދެ ބިލިއަނަށްވުރެ ގިނަ ރުފިޔާ ދައްކަން ޖެހޭކަމަށް މުއާޒް ވިދާޅުވި އެވެ.

ފެނަކައިގެ އޮޕަރޭޝަންތައް ކުރިއަށް ގެންދަމުން ދަރަނި ދެއްކުމަށް ބޮޑެތި ގޮންޖެހުންތަކެއް ހުރިކަން ފާހަގަކުރައްވާ މުއާޒް ވިދާޅުވީ މިހާތަނަށް ދަރަނީގެ 300 މިލިއަން ރުފިޔާ ދައްކާފައިވާކަމަށާއި 2027 ވަނަ އަހަރުގެ މެދަކާ ހަމައަށް ދާއިރު ދަރަނި ދައްކާ ހަލާސްކުރެވޭނެ ކަމަށް ލަފާކުރޭ ކަމަށެވެ.

ކުރީގެ ރައީސް އިބްރާހީމް މުހައްމަދު ސޯލިހްގެ ވެރިކަމުގައި ފެނަކައިން ބޮޑެތި ހިޔާނާތްތައް ހިނގިކަމުގެ އަޑުތައް އެރި ނަމަވެސް އޭގެން އެއްވެސް މައްސަލައެއް ބަލއިފައެއް ނުވެ އެވެ. އެކި ފަރާތްތަކުން ފެނަކައާ ގުޅޭ އެފަދަ އެތައް މައްސަލައެއް އޭސީސީއަށް ހުށަހެޅި ނަމަވެސް އެއްވެސް މައްސަލައެއް ކުރީގެ ސަރުކާރުން ބަލައިފައެއް ނުވެ އެވެ.