ގަދަވަޔާއެކު އައިޖީއެމްއެޗްގެ އެމާޖެންސީ ފަޅީގައި އޮންނަ ޕާކިން ޒޯނާ ޖެހިގެންހުރި ފާރެއް ވެއްޓިއްޖެ އެވެ.

ފާރާއި ފާރާއެކު ޖަހާފައިވާ ފެންސު ވެއްޓިފައިވަނީ އެ ސަރަހައްދުގައި ޕާކްކޮށްފައި ހުރި ސައިކަލްތަކުގެ މައްޗަށެވެ.

އެ ހާދިސާއާ ގުޅޭ ގޮތުން ފުލުހުން ބުނީ ދިރާގު ހެޑް އޮފީސް ކައިރީ، ޕާކިން ޒޯން ހިމެނޭ ހިސާބުގައި ޖަހާފައި ހުރި ފެންސެއް ވެއްޓިގެން ފުލުހުން ހަރަކާތްތެރިވަމުން އަންނަ ކަމަށެވެ.

ހާދިސާގައި އެއްވެސް މީހަކައަށް އަނިޔާނުވާކަމަށާއި ނަމަވެސް އެތާ ހުރި ސައިކަލުތަކަކަށް ގެއްލުންވެފައިވާ ކަމަށް ފުލުހުން ބުންޏެވެ.

މި ފަސް ދުވަހު ހުޅަނގު މޫސުމުގެ ވިއްސާރަކޮށް، ވައިގަދަ ވާނެކަމަށް މޫސުމާބެހޭ ގައުމީ އިދާރާއިން ވަނީ ބުނެފަ އެވެ. އެގޮތުން އެ އިދާރާއިން ވަނީ މިރޭ 23:00އާ ހަމައަށް ހއ. އަތޮޅުން ފެށިގެން ތ. އަތޮޅަށް ރީނދޫ އެލާޓް ނެރެފަ އެވެ.

މިރޭވެސް ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައިޖެހި، ކަނޑުތައް ގަދަވާނެ ކަމަށް މެޓް އޮފީހުން ބުނެ އެވެ.