އިޒްރޭލުން ފަލަސްތީނުގައި ހިންގާ ގަތުލްއާންމާ ދެކޮޅަށް އަޑު އުފުލަމުންދިޔަ އާއިޝަތު ޝާދިޔާ އާއި ޝަޒްރާ އިބްރާހިމްގެ ބަންދަށް އިތުރު ފަސް ދުވަސް ޖަހައިފި އެވެ.

އޮގަސްޓް 28 ގައި އެ ދެމީހުން ހައްޔަރުކުރީ ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާ ހިލާފަށް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވުމާއި ފުލުހުންގެ ވާޖިބަށް ހުރަސްއެޅުން ފަދަ އަމަލުތަކެއް ހިންގުމުގެ ތުހުމަތެވެ.

ޝާދިޔާ އާއި ޝަޒްރާގެ ބަންދަށް ފުރަތަމަ ޖެހީ ތިން ދުވަހެވެ. އެ މުއްދަތު ހަމަވެގެން މިއަދު އެ ދެމީހުން ކްރިމިނަލް ކޯޓަށް ހާޒިރުކުރުމުން ބަންދަށް އިތުރު ފަސް ދުވަސް ވަނީ ޖަހައިފަ އެވެ.

ޝާދިޔާ އަކީ ދީނީ އިލްމުވެރިޔާ މުހައްމަދު އިޔާޒުގެ އަނބިކަނބަލުންނެވެ. އިޔާޒު ގެންދަވަނީ އެކަމާއި ގުޅިގެން ވަރަށް ބޮޑަށް ސަރުކާރަށް ފާޑުކިޔަމުންނެވެ.

ޝަޒްރާ އާއި ޝާދިޔާ އަކީ އިޒްރޭލުން ފަލަސްތީނުގައި ހިންގަމުންދާ ގަތުލުއާންމާ ދެކޮޅަށް ސިލްސިލާކޮށް އަޑުއުފުލަމުން ގެންދާ ދެ މީހުނެވެ. ފާއިތުވި ދުވަސްތަކުގައި ވަނީ ސައުދީ ސަފީރު ހުޅުމާލެގައި ދިރިއުޅުއްވާ ގެކޮޅުކައިރިއަށް އެއްވެ އަޑުއުފުލާފަ އެވެ.