ޗީފް ޖުޑީޝަލް އެޑްމިނިސްޓްރޭޓާގެ މަގާމުން އައިޝަތު ރިޒްނާ މިއަދު އިސްތިއުފާ ދެއްވައިފި އެވެ.

އިސްތިއުފާދެއްވައި ރިޒްނާ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ ރައީސް ހުސައިން ރިޒާއަށް ފޮނުއްވި ސިޓީއެއްގައި ވިދާޅުވީ، މިދިޔަ ޖޫން މަހުން ފެށިގެން ޑީޖޭއޭ ހިންގުމަށް ތަންފީޒުކުރެވިފައިވާ ގާނޫނީ އޮނިގަނޑާއި ސިޔާސަތުތަކާއި އުސޫލުތަކުގެ ސަބަބުން ޖުޑިޝަލް ސާވިސް ކޮމިޝަނާއެކު މަސައްކަތް ކުރެވޭނެ އެއްވެސް މާހައުލެއް ނެތް ކަމަށެވެ.

ޝަރުއީ ދާއިރާގައި އިދާރީ ހިންގުމާ ގުޅޭ ގޮތުން ޕޮލިސީ ލެވެލެއްގައި ޖުޑިޝަލް ސާވިސް ކޮމިޝަނުގެ އިޖާބީ ތަސައްވުރެއް ހާމަކޮށްފައިނުވާ ކަމަށާއި މާނަވީ ގޮތެއްގައި އިރުޝާދެއް ނުވަތަ ލަފައެއް ވެސް މިހާތަނަށް ލިބިފައި ނުވާ ކަމަށް ރިޒްނާ ވިދާޅުވެފައިވެ އެވެ.

މައްސަލަތައް ހައްލު ކުރުމަށް މިހާތަނަށް ކުރެވުނު މަސައްކަތްތަކުގެ އެކަށީގެންވާ ނަތީޖާއެއް ލިބިފައިނުވާތީ ޖުޑިޝަރީގެ އިދާރީ ހިންގުމާ ގުޅޭ މުހިންމު ކަންތައް ހިންގުމަށް ހުރަސް އެޅިފައިވާ ކަމަށް އޭނާ ވިދާޅުވިއެވެ.

ރިޒްނާ އިސްތިއުފާ ދެއްވިއިރު އޭނާއާ ގުޅޭ ގޮތުން ހުށަހަޅާފައިވާ މައްސަލަތަކެއް ޖޭއެސްސީން އަންނަނީ ބަލަމުންނެވެ. އެނގިފައިވާގޮތުގައި ރިޒްނާއާ ގުޅޭ ގޮތުން ޖޭއެސްސީން ބަލަމުންދަނީ ފަނޑިޔާރުންގެ ހެލްތު އިންޝުއަރެންސާ ގުޅޭ މައްސަލައަކާއި މުވައްޒަފުން ނެގުމުގައި އަމަލުކޮށްފައިވާ ގޮތުގެ މައްސަލަތަކެކެވެ.

ކުރިން ޔޫއެންޑީޕީގެ އެސިސްޓެންޓް ރެސިޑެންޓް ރެޕްރެޒެންޓެޓިވްގެ މަގާމުގައި ހުންނެވި އައިޝަތު ރިޒްނާ ޗީފް ޖުޑީޝަލް އެޑްމިނިސްޓްރޭޓާގެ މަގާމަށް ހަމަޖައްސަވާފައި ވަނީ 27 ސެޕްޓެމްބަރު 2020ގަ އެވެ.