ސަރުކާރުގެ އަމަލުތައް މިހާރު ހުރި ގޮތުން ފެންނަނީ ޑިޕްލޮމަސީގައި މި ސަރުކާރުގެ ތަޖުރިބާ ނެތްކަން ކަމަށް އެމްޑީޕީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.

ޝާހިދު މިހެން ވިދާޅުވެފައިވަނީ ރައީސް މުހައްމަދު މުއިއްޒު އިންޑިއާއަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅާ ގުޅޭގޮތުން ރޭ އެކްސްގައި ކުރެއްވި ޕޯސްޓެއްގަ އެވެ.

ޝާހިދު ވިދާޅުވީ ބައިނަލްއަގްވާމީ ގުޅުންތައް ދޮގާއި، މަކަރާއި، ހީލަތުން ނުހިންގޭނެކަން މިހާރު މި ސަރުކާރަށް އިހުސާސްކުރެވޭނެ ކަމަށެވެ.

ރައީސްގެ އިންޑިއާ ދަތުރުފުޅާ ދިމާކޮށް ސަރުކާރުގެ ހާރިޖީ ސިޔާސަތާ ގުޅުވާ ގިނަބަޔަކު ދަނީ ފާޑުކިޔަމުންނެވެ. ސަރުކާރަށް ފާޑުކިޔުން އަމާޒުވެފައިވަނީ ވެރިކަމަށް އައުމުގެ ކުރިން ކުރީގެ ސަރުކާރުން އިންޑިއާއާ ބާއްވާ ގާތްގުޅުމުގެ ސަބަބުން ގިނަ ތުހުމަތުތަކެއްކޮށް "އިންޑިއާ އައުޓް" ނަމުގައި ބޮޑު ކެމްޕޭނެއް ހިންގުމަށްފަހު، ވެރިކަމަށް އައުމާއެކު އެ ހުރިހާ ކަމެއް ބަދަލުވެ އިންޑިއާއާ ގާތް ގުޅުމެއް ބާއްވަމުން ދިއުމާ ގުޅިގެންނެވެ.

މި ސަރުކާރުގެ ތިން ޑެޕިއުޓީ މިނިސްޓަރަކު އިންޑިއާގެ ބޮޑުވަޒީރު ނަރެންދްރަ މޯދީއަށް ކުޑައިމީސްކޮށް ދެއްކި ވާހަކަތަކާ ގުޅިގެން މި ސަރުކާރުން ވެރިކަމަށް އައުމަށް ފަހު ވެސް ދެ ގައުމުގެ ގުޅުން ގޯސްވި އެވެ. އެދުވަސްވަރު ރައީސް ވެސް ވަނީ އިންޑިއާއަށް ނުސީދާކޮށް ފާޑުކިއުންތަކެއް ރައްދުކުރައްވާފަ އެވެ. ނަމަވެސް މިހާރު ދެ ގައުމުގެ ގުޅުން ދަނީ ރަނގަޅުވަމުންކަން ފާހަގަކުރެވެ އެވެ.

ޝާހިދު ވިދާޅުވީ ރާއްޖެއާއި އިންޑިއާއާއި ދެމެދު އޮތް ޒަމާންވީ ގުޅުން އަލުން ރަނގަޅުވާތަން ފެނުމުން އުފާކުރައްވާކަމަށާއި އަދި އިންޑިއާއިން ދިވެހި ރައްޔިތުންނާއެކު ސާބިތުކަމާއެކު ދެމިތިބީތީ ޝާހިދު ވަނީ ޝުކުރު ދަންނަވާފަ އެވެ. މީގެ އިތުރުން އޭނާ ވިދާޅުވީ ރާއްޖެއާ އެންމެ ގާތް ރަހުމަތްތެރިޔާގެ ގޮތުގައި އަބަދުވެސް އޮންނަ އިންޑިއާއާއެކު ގުޅުން ދެމިއޮންނާނެ ކަމަށް އުއްމީދުކުރައްވާ ކަމަށެވެ.

ރައީސް އިބްރާހީމް މުހައްމަދު ސޯލިހުގެ ވެރިކަމުގައި ފައްޓަވާފައިވާ މަޝްރޫއުތައް ކާމިޔާބުވެ، ކުރިއަށް ދާތަން ފެންނާތީ އުފާކުރައްވާ ކަމަށް ވެސް ޝާހިދު ވިދާޅުވި އެވެ.

އެގޮތުން ރުޕޭ ކާޑު ތައާރަފްކުރުމާއި، ހަނިމާދޫ އެއާޕޯޓުގެ ރަންވޭ އިފްތިތާހުކުރުމުގެ އިތުރުން އެންޓި ކޮރަޕްޝަން ކޮމިޝަނާއި، ޖުޑީޝަލް ސާވިސް ކޮމިޝަން އަދި ކުޅިވަރާއި ޒުވާނުންނާ ގުޅުން ހުރި އެމްއޯޔޫތައް ދެމެހެއްޓުން ހިމެނޭކަން އޭނާ ފާހަގަކުރެއްވި އެވެ.

މީގެ އިތުރުން ކުރިން އައްޑޫ ސިޓީގައި އިންޑިއާ ކޮންސިއުލޭޓް ހުޅުވުމަށް މި ސަރުކާރުގެ ވެރިން އިދިކޮޅުގައި ތިބެ ދެކޮޅު ހެދިނަމަވެސް މިހާރު އެކަމަށް އަލުން މަޝްވަރާކޮށްފައިވާތީ އުފާކުރައްވާ ކަމަށް ޝާހިދު ވިދާޅުވި އެވެ.

އިންޑިއާގެ ރައީސްގެ ދައުވަތަކަށް ރައީސް މުއިއްޒު ކުރައްވަމުން ގެންދަވާ ދަތުރުފުޅު ނިންމަވާ ލެއްވުމަށް ހަމަޖެހިފައިވަނީ ބުރާސްފަތި ދުވަހު އެވެ.