އިޒްރޭލުން ފަލަސްތީނުގައި ހިންގަމުންދާ ގަތުލުއާންމާ ދެކޮޅަށް އަޑުއުފުލަމުންދަނިކޮށް ހައްޔަރުކުރި އާއިޝަތު ޝާދިޔާ ހައްޔަރުކުރީ ގޯސްކޮށްކަމަށް ހައިކޯޓުން މިއަދު ހުކުމްކޮށްފި އެވެ.ދީނީ އިލްމްވެރިޔާ މުހައްމަދު އިޔާޒުގެ އަނބިކަނބަލުން ޝާދިޔާ އާއި ޝަޒްރާ އިބްރާހީމް މިދިޔަ އޮގަސްޓް 28 ގައި ހައްޔަރުކުރީ ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާ ހިލާފަށް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވުމާއި ފުލުހުންގެ ވާޖިބަށް ހުރަސްއެޅުން ފަދަ އަމަލުތަކެއް ހިންގުމުގެ ތުހުމަތުގަ އެވެ. ދެ މީހުން ބަންދުން ދޫކޮށްލާފައިވަނީ 5 ސެޕްޓެމްބަރުގަ އެވެ.

ޝާދިޔާ ބަންދުކުރި އަމުރު އޭނާގެ ފަރާތުން ހައި ކޯޓުގައި އިސްތިއުނާފުކުރި މައްސަލާގައި އެ ކޯޓުން ބުނީ ޝާދިޔާ ބަންދުކުރަން ކްރިމިނަލް ކޯޓުން އަމުރު ނެރުމުގައި މުޖުތަމައަށް ނުރައްކާވާ ކަމަށް ވާސިލުވި ގޮތެއް ސާފު ނުވާކަމަށެވެ. އަދި އޭނާގެ އަމަލުން މުޖުތަމައަށް ނުރައްކާވާ ގޮތެއް ވެސް ކޯޓު އަމުރުން ނޭނގޭ ކަމަށް ހައި ކޯޓުން ބުންޏެވެ.

އެހެންވެ ޝާދިޔާ ބަންދުކުރަން ކްރިމިނަލް ކޯޓުން ނެރުނު އަމުރު ބާތިލް ކުރުމަށް ހައި ކޯޓުން ހުކުމް ކުރި އެވެ. ހައި ކޯޓުން މި ހުކުމް މިއަދު އިއްވީ ބެންޗުގައި ތިއްބެވި ފަނޑިޔާރުންގެ އިއްތިފާގުންނެވެ.