މާލޭގެ ގެއަކަށް މީހަކު ވައްދައި އެ މީހާ ބަރަހަނާކޮށް، ބިރު ދައްކައިގެން ފޭރުނު މައްސަލާގައި ހައްޔަރުކުރި ތިން މީހެއްގެ މައްޗަށް ދައުވާ ކޮށްފި އެވެ.

ފޭރުނު މައްސަލާގައި ޕީޖީ އޮފީހުން ދައުވާކޮށްފައިވަނީ މިދިޔަ ޖުލައި މަހުގެ 24 ވަނަ ދުވަހުގެ ވަގުތެއްގައި، މއ. މަސްފަން ގެއަށް ދިވެހި ފިރިހެނަކު ވައްދައި އޭނާއަށް ބިރުދައްކައި ފޭރުނު މައްސަލައިގައި ހައްޔަރުކޮށްފައިވާ ތިން މީހެއްގެ މައްޗަށެވެ.

މި މައްސަލައިގައި ދައުވާ އުފުލާފައިވަނީ ސ. ހިތަދޫ ސޯމާ، ޝަފީގު އިބްރާހީމް އާއި މއ. މަސްފެން މުހައްމަދު ރީހާން އަދި އައިޝަތުގެ މައްޗަށެވެ. މި ތިން މީހުންނާ ގުޅޭ މައުލޫމާތު ފުލުހުން ވަނީ ކުރިން އާންމުކޮށްފަ އެވެ. އަދި މިއީ މިފަދަ ކުށުގެ ރެކޯޑު އޮންނަ ބައެއް ކަމަށް ވެސް ފުލުހުން ވަނީ ފާހަގަކޮށްފަ އެވެ.

ފުލުހުން ބުނީ މި ތިން މީހުން ހައްޔަރުކޮށްފައިވަނީ، މީހަކު ގެއަކަށް ވައްދައި އެމީހާއަށް ވަޅިން ބިރުދައްކައި އޮރިޔާންކޮށް، އަނިޔާކޮށް، އޭނާގެ މޯބައިލް ފޯނު އަތުލައި އޭނާގެ ބޭންކު އެކައުންޓުން ފައިސާ ޓްރާންސްފަކުރުވައި އަދި އޭނާގެ ކޭޝްކާޑު ބޭނުންކޮށްގެން އޭޓީއެމުން ފައިސާ ނަގާފައިވާ ކަމަށް ތުހުމަތުކުރެވޭތީ އެވެ. މި މައްސަލައާ ގުޅިގެން ކޯޓު އަމުރެއްގެ ދަށުން މި ތިން މީހުން ހައްޔަރުކޮށް، ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކުރުމަށް ކޯޓުން ވަނީ އަމުރުކޮށްފަ އެވެ.

މި ތިން މީހުންގެ މައްޗަށް އުފުލާފައި ވަނީ އަނިޔާއެއް ދިނުމުގެ ކުށުގެ ދައުވާ، އެނގިހުރެ ހުއްދަ ނޫން ގޮތެއްގައި މައުލޫމާތު ހޯދުމުގެ ކުށުގެ ދައުވާ އަދި ފޭރުމުގެ ކުށުގެ ދައުވާ އެވެ.