ފަލަސްތީނުގެ ރެފިއުޖީންނަށް އެހީވުމަށް އދ. އިން އުފައްދާފައިވާ ޖަމިއްޔާ، ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ (އަންރުވާ) ފޮހެލަން އިޒްރޭލުން ކުރަމުން އަންނަ މަސައްކަތް ރާއްޖެއިން ކުށްވެރިކޮށްފި އެވެ.

ފަލަސްތީނުގެ ބިމުގައި ޔަހޫދީން ވަޒަންވެރި ކުރުމަށް އިޒްރޭލުން ކުރާ މަސައްކަތުގެ ތެރެއިން އަންރުވާ އުވާލައި އެ ޖަމިއްޔާގެ އޮފީސްތަކަށް ވެރިވެގަތުމަށް ދަނީ މަސައްކަތް ކުރަމުންނެވެ.

އިރުމަތީ ޤުދުސްގައި އިޒްރޭލުން ވަޒަންވެރި ކުރުވަމުން އަންނަ ސަރަހައްދުގައި ހުރި އަންރުވާގެ އޮފީސް ނައްތާލައި އެ ސަރަހައްދުގައި ޔާހޫދީން އިތުރަށް ވަޒަންވެރި ކުރުވަން އިޒްރޭލުން ވަނީ ނިންމާފަ އެވެ. އަންރުވާގެ ހަރަކާތްތައް އެ ސަރަހައްދުގައި ކުރިއަށް ގެންދިއުން ހުއްޓުވުމަށާއި އަންރުވާއާއިއެކު ވެފައިވާ އެއްބަސްވުންތައް އުވާލުމަށް އިޒްރޭލުގެ ޤާނޫނު ހަދާ މަޖިލީހުގެ ކޮމިޓީއަކުން ވަނީ ބިލްތަކެއްވެސް ފާސްކޮށްފަ އެވެ.

ދިވެހި ސަރުކާރުން މިއަދު ހެނދުނު އެކަން ކުށްވެރިކޮށް ނެރުނު ބަޔާނެއްގައި ބުނީ ބައިނަލްއަގްވާމީ ޤާނޫނުތަކާއި އިންސާނިއްޔަތާބެހޭ ޤާނޫނުތަކަށް ބޯނުލެނބުމުގައި އިޒްރޭލުން ގެންގުޅޭ ސިޔާސަތު ރާއްޖެއިން ކުށްވެރި ކުރާކަމަށާއި އަންރުވާ ނައްތާލަން އިޒްރޭލުންކުރާ މަސައްކަތް އެންމެ ހަރުކަށި އިބާރާތުން ކުށްވެރިކުރާ ކަމަށެވެ.

އިޒްރޭލުން މި އަމަލުތަކަށް ޖަވާބުދާރީ ކުރުވުމަށް ވެސް ރާއްޖެއިން ވަނީ ގޮވާލާފަ އެވެ.