ގޭހުގެ ވިޔަފާރި ކުރާ ކުންފުނި މޯލްޑިވް ގޭސް އިން ގޭސް ލިބުން ދަތިވެ، އެމެޖެންސީކޮށް ގޭސް ގެންނަން 3 ލައްކަ އަށްވުރެ ގިނަ ޑޮލަރު ލަންކާގެ ކުންފުންޏަކަށް ދައްކައިފި އެވެ.

"ހުރިހާ" އަށް އެނގިފައިވާ ގޮތުގައި މޯލްޑިވް ގޭހުން ވަނީ 384,600 ޑޮލަރު ލަންކާގެ "3ޑީއެވް އިންޓަނޭޝަނަލް ޕްރައިވެޓް ލިމިޓެޑް" ކިޔާ ކުންފުންޏަކަށް ދައްކާފަ އެވެ. އެ ކުންފުންޏަކީ ބްލެކްލިސްޓް ކޮށްފައިވާ ކުންފުންޏެއް ކަމަށްވެސް ބައެއް ފަރާތްތަކުން ދަނީ ބުނަމުންނެވެ.

މާލީ ދަތިކަން ކުރިމަތިވެގެން ޝިޕްމަންޓް ނުގެނެވިގެން މޯލްޑިވް ގޭސް އިން ވަނީ ގޭސް ހުސްވެފަ އެވެ. މިއާއެކު އެ ކުންފުނިން ގޭސް ވިއްކާ ބައެއް ރަށްރަށުން މިހާރު ވަނީ ގޭސް ހުސްވެފަ އެވެ.

އިތުބާރު ހުރި ގޮތަކަށް "ހުރިހާ"އަށް އެނގިފައިވާ ގޮތުގައި މޯލްޑިވް ގޭހުން ގޭސް ހުސްވުމުން މިވަގުތަށް ބޭނުންވާ ގޭސް ގަންނަނީ ވިލާ ހަކަތައިންނެވެ. އަދި ވިލާ ހަކަތައިން މޯލްޑިވް ގޭހަށް ގޭސް ވިއްކަނީ މާކެޓްގައި ވިއްކާ އަގަށް ވުރެ ހެޔޮ އަގެއް ކަމަށް ވެސް އެނގިފައިވެ އެވެ.

މޯލްޑިވް ގޭހުން ގޭސް ޝިޕްމަންޓް ނުގެނެވި ލަސްވެގެން އުޅެނީ އެ ކުންފުނީގެ މާލީ ހާލަތު ހުރި ގޮތުން ކަމަށް އެނގިފައިވެ އެވެ. ނަމަވެސް އެ ކުންފުނިން މިކަން ދޮގުކޮށް ބައެއް ނޫސްތަކަށް އިންޓަވިއު ދީފައިވެ އެވެ.

އެނގިފައިވާ ގޮތުގައި މޯލްޑިވް ގޭހަށް މިފަހަރުގެ ޝިޕްމަންޓް ނުގެނެވި ލަސްވީ އެސްޓީއޯގެ މާލީ ހާލަތު އިންތިހާއަށް ދަށްވެގެން ޝިޕްމަންޓަށް ފައިސާ ދައްކަން ޖެހޭ ދުވަހަށް ނުދެއްކިގެންނެވެ. އެސްޓީއޯއަކީ މޯލްޑިވް ގޭހުގެ މެޖޯރިޓީ ހިއްސާދާރެވެ. އެ ކުންފުނީގައި ޗަމްޕާ ބްރަދާސްގެ ބޮޑު ހިއްސާއެއް ވެސް އޮވެ އެވެ.