ވަޒީފާ ގެއްލިދާނެކަމުގެ ބިރު ބޮޑުވެފައިވާ މި ދަންޑިވަޅުގައި، ހޯމް މިނިސްޓްރީގެ ޓީމުން ވެރިކަން ކުރާ ޕާޓީ ޕީއެންސީއަށް ފޯމް ހަމަކޮށް ހަވާލުކޮށްފި އެވެ.

ފޯމްތައް ހަވާލުކުރުން އޮތީ ހޯމް މިނިސްޓަރު އަލީ އިހުސާންއާއި އެ މިނިސްޓްރީގެ ގިނަ އަދަދެއްގެ ސިޔާސީ މުވައްޒަފުންނާއެކު މިއަދު ޕީއެންސީ އޮފީހުގަ އެވެ.

ޕީއެންސީއަށް މެންބަރުން އިތުރުކުރުމަށް ރައީސް މުއިއްޒު ބޭނުންފުޅުވާތީ ވަނީ ސިޔާސީ ހުރިހާ މުވައްޒަފުން ވަކި އަދަދަކަށް ފޯމް ގެނައުމަށް އަންގާފަ އެވެ.

ރައީސް މުއިއްޒު ސިޔާސީ މުވައްޒަފުން މަދުކުރެއްވުމުގެ މަސައްކަތް ފައްޓަވާފައިވާއިރު، ވަޒީފާއިން ވަކިކުރާ މީހުންގެ ތެރޭގައި ޕީއެންސީއަށް ފޯމް ހަމަނުވާ މީހުން ފާހަގަކުރާކަން ވަރަށް އިތުބާރުހުރި މަސްދަރަކުން "ހުރިހާ" އަށް ވަނީ އެނގިފަ އެވެ.

މިކަމުގައި މިހާ ބޮޑަށް މަޖުބޫރުކޮށްގެން އުޅޭ އިރުވެސް ޕީއެންސީއަށް މެންބަރުން އިތުރުކުރުމުގައި އެ ޕާޓީއަށް ގިނަ ގޮންޖެހުންތަކެއް ދަނީ ކުރިމަތިވަމުންނެވެ. އޭގެ ތެރޭގައި ގިނަ ރައްޔިތުން ޕީއެންސީއާ ގުޅެން ބޭނުންނުވުން ހިމެނެ އެވެ. ހާއްސަކޮށް މިހާރު ޕީޕީއެމް މެންބަރުންގެ ގޮތުގައި ތިބި މެންބަރުން ޕާޓީ ބަދަލުކުރަން ބޭނުން ނުވާކަމަށް ދަނީ ބުނަމުންނެވެ.

މިކަމާއި ގުޅިގެން ޕީއެންސީން ދަނީ 38،000 މެންބަރުން ތިބި ރާއްޖޭގެ އެންމެ ބޮޑު ޕާޓީ ޕީޕީއެމް އުވާލުމުގެ މަސައްކަތްވެސް ކުރަމުންނެވެ.