މީގެ ހަތަރު މަސް ދުވަސް ކުރިން ކައިވެނިކުރި ބޮލީވުޑްގެ ތަރި ސޮނާކްޝީ ސިންހާ އިނީ އޭނާގެ އަލަތު ދަރިފުޅަށް ބަލިވެ ކަމަށް އަޑު ފެތުރެން ފަށައިފި އެވެ.

މި އަޑުތައް ފެތުރެން ފަށާފައިވަނީ ދާދި ފަހުން ސޮނާކްޝީ އޭނާގެ ފިރިމީހާ ޒަހީރު އިގްބާލްއާއެކު ނަގާފައިވާ ފޮޓޯތަކެއް ސޯޝަލް މީޑިއާގައި ހިއްސާ ކުރުމުންނެވެ.

ރަތް ކުލައިގެ ދޯޕައްޓާ ހެދުމެއްގައި ސޮނާކްޝީ ހުރި އެ ފޮޓޯތަކުން އޭނާގެ ބަނޑު ކޮންމެވެސް ވަރަކަށް ނިކުމެފައިވާކަން ގިނަ ބަޔަކު އަންނަނީ ފާހަގަ ކުރަމުންނެވެ.

އެއާއެކު ސޮނާކްޝީ އިނީ ބަލިވެ ކަމަށް ނިންމައި އެ ޕޯސްޓަށް ކޮމެންޓް ކުރަމުން އަންނަ މީހުން ދަނީ އެ ދެމަފިރިންނަށް މަރުހަބާވެސް ކިޔަމުންނެވެ.

މި ހަބަރުތައް ސޮނާކްޝީގެ ދެމަފިރިން ޔަގީން ކޮށްދީފައި ނުވާއިރު ސަޕޯޓަރުން އަންނަނީ އެކަމާ ގުޅިގެން އޭނާގެ ބަހަކަށް އިންތިޒާރު ކުރަމުންނެވެ.

ސޮނާކްޝީއާއި ޒަހީރު ކައިވެނި ކޮށްފައިވަނީ މިދިޔަ ޖޫން މަހުގެ 23 ވަނަ ދުވަހު ބޭއްވި ކޯޓު ކައިވެންޏެއްގަ އެވެ. ސޮނާކްޝީއަކީ ހިންދޫއަކަށްވާއިރު ޒަހީރުއަކީ މުސްލިމެކެވެ.