ވޯލްޑް ކަޕާއި އޭޝިއަން ކަޕް ޖޮއިންޓް ކޮލިފައިންގައި ރާއްޖެ ހިމެނޭ ގުރޫޕްގައި ބާކީ އޮތް މެޗުތައް ޗައިނާގައި ކުޅޭ ގޮތަށް އޭޝިއަން ފުޓްބޯލް ކޮންފެޑަރޭޝަން (އޭއެފްސީ) އިން ހަމަޖައްސައިފި އެވެ.

ކޮވިޑް-19އާ ގުޅިގެން، އޭއެފްސީން ވަނީ ކޮލިފައިންގައި ބާކީ ހުރި މެޗުތައް ސެންޓްރަލައިޒްކޮށް ކުޅޭ ގޮތަށް ނިންމައިފަ އެވެ. އެގޮތުން ރާއްޖެ ހިމެނޭ ގުރޫޕް އޭގައި ބާކީ އޮތް މެޗުތައް ކުޅުމަށް ނިންމީ ޗައިނާގަ އެވެ.

ކޮވިޑް-19އާ ގުޅިގެން ވޯލްޑް ކަޕް ކޮލިފައިންގެ މެޗުތައް އެންމެ ފުރަަތަމަ ފަސްކުރީ މިދިޔަ އަަހަރެވެ. މިދިޔަ އަހަރުގެ މާޗު މަހު ކުޅެން އޮތް މެޗުތައް ދެ ފަހަރަށް ފަސްކުރި އެވެ. މި މަހު އެ މެޗުތައް ކުޅެން އޮތް ނަމަވެސް، ހަތަރު މެޗެއް ފިޔަވައި އެހެން ހުރިހާ މެޗެއް ޖޫން މަހު ކުޅެން އޭއެފްސީން ނިންމައިފަ އެވެ.

ރާއްޖެ އާއި ޗައިނާއާއެކު، ގުރޫޕް އޭގައި ދެން އޮތީ ސީރިއާ އާއި ފިލިޕީންސް އަދި ގުއާމެވެ. ގުރޫޕްގެ އެއްވަނައިގައި 15 ޕޮއިންޓާއެކު އޮތީ ސީރިއާ އެވެ. ޗައިނާ އާއި ފިލިޕީންސް ހަތް ޕޮއިންޓާއެކު އޮތްއިރު، ރާއްޖެ އަށް ލިބިފައިވަނީ ހަ ޕޮއިންޓެެވެ. ތާވަލްގެ ފުލުގައި އޮތް ގުއާމަށް ޕޮއިންޓެއް ނުލިބެ އެވެ.

ޗައިނާގެ އިތުރުން ދެން މެޗުތައް ހޯސްޓްކުރާނީ ކުވޭތު، ބަހުރޭން، ސައުދީ އަރަބިއްޔާ، ގަތަރު، ޖަޕާން، ޔޫއެއީ އަދި ދެކުނު ކޮރެއާ އެވެ.