ދުނިޔޭގެ ރީތީގެ މުބާރާތް "މިސް ޔުނިވާސް"ގެ ތާރީހުގައި ވެސް އެންމެ ފުރަތަމަ ފަހަރަށް އެ މުބާރާތުގައި ބުރުގާއެޅި އަންހެނަކު ބައިވެރިވެއްޖެ އެވެ.

މި މަހުގެ 16 ވަނަ ދުވަހު ފަށަން ހަމަޖެހިފައިވާ މިސް ޔުނިވާސްގައި އެފްރިކާގެ ގައުމެއް ކަމަށްވާ ސޯމާލިއާ ތަމްސީލުކުރާ ޚަދީޖާ އުމަރުއަކީ ބުރުގާ އަޅާ ޒުވާނެކެވެ.

ކެންޔާގެ ރެފިއުޖީ ކޭމްޕަކަށް އުފަން ޚަދީޖާގެ އުމުރުން 10 އަހަރުގައި އޭނާގެ އާއިލާ ކެނެޑާއަށް ދިރިއުޅުން ބަދަލުކުރުން ވެގެންދިޔައީ އޭނާއަށް އެތައް ދޮރެއް ހުޅުވިގެންދިޔަ ފުރުސަތަކަށެވެ.

23 އަހަރުގެ ހަގު އުމުރުގައި ޚަދީޖާ ވަނީ ބިއުޓީއާއި ފެޝަން އިންފްލުއެންސަރެއްގެ ގޮތުގައި މަގުބޫލުކަން ހޯދާފަ އެވެ. އެއާއެކު އޭނާއަކީ ފޮޓޯގްރަފީއާއި މޮޑެލިންގެ އިތުރުން ސޯޝަލް މީޑިއާ މާކެޓިންގައި ވެސް ހަރަކާތްތެރިވާ ޒުވާނެކެވެ.

ހަދީޖާއަކީ އޭނާގެ އަމިއްލަ ބިއުޓީ ބްރޭންޑެއް ހިންގަމުން އަންނަ ވިޔަފާރިވެރިއެއްވެސްމެ އެވެ. އޭނާގެ ބްރޭންޑް "ކޭ އަމާނީ"އަކީ ރީތީގެ މިންގަނޑުތައް މުޅިން ބަދަލުކޮށް އަންހެނުން ބާރުވެރި ކުރަން މަސައްކަތްކުރާ ބްރޭންޑެކެވެ.

އިޖުތިމާއީ ގިނަ ކަންކަމުގައި ވެސް ވަރަށް ހަރަކާތްތެރިކޮށް އުޅޭ ޚަދީޖާ ވަނީ މިސް ވޯލްޑްގައި ވެސް ބައިވެރިވެ ބައިނަލްއަގްވާމީ ރީތީގެ މުބާރާތެއްގައި ބައިވެރިވި ފުރަތަމަ ބުރުގާއެޅި މޮޑެލްގެ ޝަރަފު ހޯދާފަ އެވެ.

ބުރުގާ އަޅައި ނިވާވެގެން ވެސް ބައިނަލްއަގްވާމީ ފެންވަރުގެ މުބާރާތްތަކުގައި ބައިވެރި ވެވިދާނެކަން ސާބިތުކޮށްދެމުން ޚަދީޖާ ވަނީ ގިނަ މުސްލިމް އަންހެނުންނަށް މެސެޖެއް ފޯރުކޮށްދީފަ އެވެ.

އެގޮތުން ގިނަ މުސްލިމް ގައުމުތަކުގައި އޭނާގެ ހިތްވަރާއި އަޒުމަށް ސާބަސް ދެމުން އަންނައިރު ފާހަގަކޮށްލަންޖެހޭ ކަމަކީ މިސް ޔުނިވާސްގައި ބައިވެރިވި ގިނަ މުސްލިމް ގައުމުތައް ތަމްސީލު ކުރަނީ ބުރުގާ ނާޅާ މޮޑެލުން ކަމެވެ.