ޣައްޒާގެ އެކި ސަރަޙައްދުތަކަށް އިޒްރޭލުން ދިން ވައިގެ ހަމަލާތަކުގައި 50 އަށްވުރެ ގިނަ ފަލަސްތީނު ރައްޔިތުން ޝަހީދުކޮށްލައިފި އެވެ.

މީގެ ތެރެއިން 42 މީހުން ޝަހީދުކޮށްލާފައިވަނީ ޣައްޒާގެ އުތުރުގެ ސަރަޙައްދަށް ދިން ހަމަލާތަކުގައި އެވެ.

ލުބުނާނުގެ ޕަބްލިކް ހެލްތު މިނިސްޓްރީން ބުނެފައިވާ ގޮތުގައި، ވޭތުވެދިޔަ 24 ގަޑިއިރުގެ ތެރޭގައި އެ ޤައުމުގެ އެކި ސަރަހައްދުތަކަށް އިޒްރޭލުން ދިން ހަމަލާތަކުގައި 53 މީހުން ޝަހީދުވެ، 161 މީހުން ޒަހަމްވެފައިވެ އެވެ.

ލުބުނާނުގެ ސައިޑާ ސިޓީގައި އުޅަނދަކަށް އިޒްރޭލުން ދިން ކަމަށް ބެލެވޭ ވައިގެ ހަމަލާއެއްގައި 3 މީހުން ޝަހީދުވެ، ޔުނައިޓެޑް ނޭޝަންސް އިންޓަރިމް ފޯސް އިން ލެބަނަން (ޔޫނިފިލް) އާއެކު މަސައްކަތްކުރާ ހަ މީހަކަށް އެކިވަރުގެ އަނިޔާވެފައިވެ އެވެ.

އޮކްޓޯބަރ 7، 2023 އިން ފެށިގެން ޣައްޒާގައި އިޒްރޭލުން ހިންގަމުންދާ ނަސްލު ނައްތާލުމުގެ އަމަލުތަކުގައި މަދުވެގެން 43،469 ފަލަސްތީނު ރައްޔިތުން ޝަހީދުވެ، 102،561 މީހުން ޒަހަމްވެފައިވެ އެވެ.

ޣައްޒާގައި ހަނގުރާމަ ފެށުނީއްސުރެ ލުބުނާނަށް އިޒްރޭލުން ދީފައިވާ ހަމަލާތަކުގައި މަދުވެގެން 3،103 މީހުން ޝަހީދުވެ، 13،856 މީހުން ޒަހަމްވެފައިވެ އެވެ.