އެންޓި ކޮރަޕްޝަން ކޮމިޝަން (އޭސީސީ)ގައި ހުސްވެފައިވާ މެންބަރު ކަމަށް ކުރިމަތިލުމަށް ހުޅުވާލައިފި އެވެ.

އޭސީސީގެ މެންބަރު ކަމަށް ކުރިމަތިލުމަށް ފުރުސަތު ހުޅުވާލައި ރައީސް އޮފީހުން މިއަދު އިއުލާނެއް ނެރެފައިވާއިރު، އެ އިއުލާނުގައި ބުނެފައިވަނީ އޭސީސީގެ މެންބަރު ކަމަށް ޝައުގުވެރިވާ ފަރާތްތަކުން މިމަހުގެ 16 ވަނަ މެންދުރު 12:00ގެ ކުރިން ކަމާ ގުޅޭ ލިޔުންތަކާ އެކު ފޯމު ހުށަހެޅުމަށް އެދިފަ އެވެ.

އޭސީސީގެ ދެ މެންބަރެއްގެ މަގާމު ހުސްވީ މިދިޔަ ނޮވެމްބަރު މަހު 25 ވަނަ ދުވަހުގައި އެ ކޮމިޝަންގެ ނައިބު ރައީސްގެ ގޮތުގައި ހުންނެވި އަބްދުލް ސަލާމް އާއި މެންބަރެއްގެ ގޮތުގައި ހުންނެވި ތޯހާ މުހައްމަދަށް ރައްޔިތުންގެ މަޖިލީހުން ބޮޑެތި ތުހުމަތުތަކެއްކޮށް އެ ދެ ބޭފުޅުން މަގާމުން ވަކިކުރުމަށް މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމާ، މަޖިލީހުގެ ތަޅުމުން ވޯޓަށް އެހުމަށް ތައްޔާރުވަމުން ދަނިކޮށް މަގާމުން އިސްތިއުފާ ދެއްވުމާ ގުޅިގެންނެވެ.

އޭސީސީގައި މެންބަރުންގެ ގޮތުގައި މިވަގުތު ތިއްބެވީ އެ ކޮމިޝަންގެ ރައީސް އާދަމް ޝާމިލާއި މެންބަރުން ކަމަށްވާ ޝިޔާމާ މުހައްމަދުގެ އިތުރުން ޝަޒްނާ ހާޝިމެވެ.

އޭސީސީއާއި އީސީގެ ރައީސް އާއި ނައިބް ރައީސް އަކީ ރައީސް އައްޔަންކުރައްވާ މަގާމުތަކެއްގެ ގޮތުގައި ހެދުމަށް އެ މުއައްސަސާގެ ގާނޫނުވެސް މިހާރު ވަނީ އިސްލާހުކޮށްފަ އެވެ.

އެހެން ނަމަވެސް މި އިސްލާހާ އެއްގޮތަށް އަދި އޭސީސީއާއި އީސީގެ ރައީސް އައްޔަންކޮށްފައި ނުވެ އެވެ.