އަންނަ ރަމަޟާން މަހު އިމާމުވެ ހިފްޒުކޮށް ތަރާވީހު ނަމާދު ކުރާނެ ދިވެހި ހާފިޒުން ހޯދަން އިސްލާމިކް މިނިސްޓްރީން އިއުލާނުކޮށްފި އެވެ.

އިސްލާމިކް މިނިސްޓްރީން މިއަދު ނެރުނު އިއުލާނެއްގައި ވަނީ ދިވެހި ހާފިޒުން ހޯދަނީ މަސްޖިދުއްސުލްތާން މުހައްމަދު ތަކުރުފާނުލް އައުޒަމް (އިސްލާމީ މަރުކަޒު) އާއި މަސްޖިދު މަލިކި ސަލްމާން މިސްކިތަށް ކަމަށެވެ. އަދި މި މިސްކިތްތަކުގައި އިމާމުވެ، ހިފްޒުކޮށް ތަރާވީހު ނަމާދުކުރާ ފަރާތްތަކަކީ ދިވެހި ހާފިޒުން ކަމުގައި ހެދުމަށާއި އެކަމަށް އެންމެ ގާބިލު ދިވެހި ހާފިޒުން ހޯދަން ބޭނުންވާ ކަމަށް އެ މިނިސްޓްރީގެ އިއުލާނުގައި ބުނެފައިވެ އެވެ.

އެ އިއުލާނުގައި ބުނީ އަންނަ ރަމަޟާން މަހު މިސްކިތްތަކުގައި އިމާމުވެ ހިފްޒުކޮށް ތަރާވީހު ނަމާދު ކުރާނެ އެކަމަށް ޝައުގުވެރިވާ ފަރާތްތަކަށް މިހާރު އެ ފުރުސަތު ހުޅުވާލައިފައިވާ ކަމަށެވެ.

އިސްލާމިކް މިނިސްޓްރީން ބުނީ ހިފްޒުކޮށް، އިމާމުވެ ތަރާވީހް ނަމާދު ކުރަން ބޭނުންވާ ދިވެހި ހާފިޒުންގެ ފޯމު ފުރިހަމަކޮށް ލިޔުންތަކާ އެކު އަންނަ ފެބްރުއަރީ މަހުގެ 16 ވަނަ ދުވަހުގެ ކުރިން މިނިސްޓްރީއަށް ފޯމު ހުށަހަޅަން ޖެހޭ ކަމަށެވެ.

އިސްލާމީ މަރުކަޒުގަ އާއި މަސްޖިދު މަލިކި ސަލްމާންގައި ހިފްޒުކޮށް ތަރާވީހު ނަމާދު ކުރުމަށް އެދި ހުށަހަޅާ ފަރާތްތަކުގެ މެދުގައި ޓެސްޓެއް ބޭއްވޭނެ ކަމަށް މިނިސްޓްރީން ބުނެ އެވެ.

އެއަށްފަހު ހިފްޒު އެންމެ ރަނގަޅު 04 ފަރާތެއް ކަނޑައެޅިގެންދާނެ ކަމަށް ވެސް މިނިސްޓްރީން ވަނީ ބުނެފަ އެވެ.

ހާފިޒުންނަނަށް 700 ރުފިޔާގެ އެލަވަންސްއެއް ދޭން ނިންމާފައިވާއިރު، ހާފިޒުންނަށް ފައިސާ ދޭނީ ގިނަވެގެން މިސްކިތަކަށް ދެ ހާފިޒުންނަށް ކަމަށް މިނިސްޓްރީން ބުނެ އެވެ.