އިމާރާތް ތަޅައިދިނުން ނުވަތަ ޑިމޮލިޝިންގެ ހިދުމަތް ދޭން ނިންމާ އެކަމަށް ތައްޔާރުވަމުން އަންނަކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފި އެވެ.

ކުނި އުކުމުގެ މަސައްކަތް ކުރަމުން އަންނަ ވެމްކޯއިން މިހާރު ވަނީ އޮފީސް އިމާރާތް ފޮޅާ ސާފުކޮށްދިނުމުގެ މަސައްކަތްވެސް ކުރަން ފަށާފަ އެވެ.

ބާވެ ވައްޓާލަންޖެހޭ އިމާރާތްތައް ތަޅައިދިނުމުގެ މަސައްކަތް ފަށަން އެ ކުންފުނިން ނިންމާފައިވާކަމަށް ބުނެފައިވާއިރު، އެގޮތުން އަންނަ އަހަރުގެ ކުރީކޮޅު މި މަސައްކަތް ފެށުމަށް ތައްޔާރުވަމުން އަންނަކަމަށް ވެމްކޯއިން ބުނެ އެވެ.

އެ ކުންފުނިން ބުނީ އިމާރާތްތައް ތަޅައިދިނުމުގެ ހިދުމަތް ފުރަތަމަ ފަށާނީ މާލެ ސަރަހައްދުގައި މި މަސައްކަތް ފެށުމަށް ކަމަށާއި ކަމާއި ގުޅޭ އިދާރާތަކާއި އެކު މަޝްވަރާކުރަމުން އަންނަކަމަށް ވެސް ވެމްކޯއިން ބުނެއެވެ. އަދި މި ހިދުމަތް ދޭނެ އަގުތައް ކަނޑައަޅާ އާއްމުކުރާނީ މި މަޝްވަރާތަކަށް ފަހުކަމަށް އެކުންފުނިން ބުނެއެވެ.

މި ހިދުމަތް ދޭން ފަށާނީ އެކުންފުނީގެ މުވައްޒަފުން ބޭނުންކޮށްގެންކަށާއި ހިދުމަތް ފެށުމަށް ފަހު އިތުރު މުވައްޒަފުން ބޭނުންވާނަމަ އެކަމަށް އެކަށީގެންވާ ވަރަށް މުވައްޒަފުން ހޯދާނެކަމަށް ވެސް ވެމްކޯއިން ބުންޏެވެ.

ވެމްކޯއިން މިހާރުވެސް އަންނަނީ މާލޭ ސަރަހައްދުގައި ތަޅައިލައި އިމާރާތްތަކުގެ ގާކުނޑިތައް އުކާދިނުމުގެ މަސައްކަތް ކުރަމުންމެވެ.

ކުނި އުކާލުމަށް އުފެއްދި ވެމްކޯއިން މިހާރު ވަނީ މި ހިދުމަތް ރާއްޖޭގެ ވަރަށް ގިނަ ރަށްތަކުގައި ދޭން ފަށާފައެވެ. ވެމްކޯއިން ދޭ ފޮޅާ ސާފުކުރުމުގެ ހިދުމަތް ސަރުކާރުން ގިނަ އިދާރާތަކުން މިހާރު އަންނަނީ ހޯދަމުންނެވެ.