ރާއްޖޭގައި ގަވާއިދާ ހިލާފަށް 12 އަހަރު ވަންދެން އުޅުނު ފްރާންސްގެ އާއިލާއެއް ފުރުވާލުމުގެ މަސައްކަތް ކުރަމުންދާ ކަމަށް އިމިގްރޭޝަނުން ބުނެފި އެވެ.

އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދު 'އެކްސް'ގައި ވިދާޅުވީ އެ އާއިލާގެ މައުލޫމާތު މިދިޔަ ޖުލައި މަހު 'އިމިގްރޭޝަން ވޮޗު'އަށް ލިބިފައިވާ ކަމަށެވެ.

ކޮންޓްރޯލާ ވިދާޅުވީ މިހާރު ކުރަމުންދަނީ އެ އާއިލާ ފުރުވާލުމަށް ބޭނުންވާ ޓްރެވެލް ޑޮކިއުމެންޓުތައް ފޮރިން މިނިސްޓްރީއާ ގުޅިގެން ހޯދުމުގެ މަސައްކަތް ކަމަށެވެ.

ހަ މެންބަރުންގެ އެ އާއިލާގެ އެންމެންގެ ޕާސްޕޯޓުގެ މުއްދަތު ވަނީ ހަމަވެފަ އެވެ. އެ މައްސަލާގައި ހިމެނޭ އިސް ފަރާތްތައް މިދިޔަ އޮކްޓޫބަރު މަހުގެ ތެރޭގައި ވަނީ އިމިގްރޭޝަނަށް ހާޒިރުކޮށްފައިވާ ކަމަށް ވެސް އޭނާ ވިދާޅުވި އެވެ.

ޝަމްއާން ވިދާޅުވީ މިހާރު މަސައްކަތް ކުރަނީ ޓެރެވެލް ޑޮކިއުމަންޓަކާއެކު އެ މީހުން ފުރުވާލުމަށް ކަމަށެވެ. އަދި ޓްރެވެލް ޑޮކިއުމެންޓް ލިބުނުހާ އަވަހަކަށް އެ މީހުން ރާއްޖޭން ފުރުވާލާނެ ކަމަށް އޭނާ ވިދާޅުވި އެވެ.