ބުރާސްފަތިދުވަހުން ފެށިގެން ކުރިއަށް އޮތް 4 ދުވަހު މޫސުން އިތުރަށް ގޯސްވާނެކަމަށް ލަފާކުރެވޭކަމަށް މުސުމާބެހޭ ގައުމީ އިދާރާއިން ބުނެފިއެވެ.

މޫސުމާބެހޭ ގައުމީ އިދާރާއިން ބުނީ މި ދުވަސްވަރަކީ ރާއްޖެ ސަރަހައްދަށް ހުޅަނގު މޫސުން ނިމި، އިރުވައި މޫސުން ފެށޭ ދުވަސްވަރު ކަމަށްވާތީ މިދުވަސްވަރު ކޮޅިގަނޑުތައް އުފެދުމުގެ ފުރުސުތު އޮންނާނެކަމަށެވެ.

މެޓް އޮފީހުން ބުނީ މިހާރު ކުރަމުންދާ ވިއްސާރާގައި ކުރިއަށް އޮތް 4 ދުވަހު ދެކުނާއި މެދުރާއްޖެތެރޭގެ ރަށްތަކަށް މޫސުން ވަރަށް ބޮޑަށް ގޯސްވާނެކަމަށެވެ. އެގޮތުން ބުރާސްފަތި، ހުކުރު، ހޮނިހިރު، އާދިއްތަ ދުވަހު ވަރަށް ބޮޑަށް ވައިގަދަވެ، ކަނޑުތައް ގަދަވާނެކަމަށް މެޓް އޮފީހުން ބުނެ އެވެ. އަދި މި ދުވަސްވަރު ކަނޑު ގަދަވުމުގެ ސަބަބުން ބައެއް ރަށްރަށަށް އުދައިގެ އަސަރު ކުރުން އެކަށީގެންވާކަމަށްވެސް މެޓް އޮފީހުން ބުންޏެވެ.

މެޓް އޮފީހުން ބުނީ ދެކުނާއި މެދުރާއްޖެތެރޭގެ އިތުރުން، އުތުރުގެ ރަށްތަކަށްވެސް މޫސުން ކޮންމެވެސް ވަރަކަށް ގޯސްވާނެކަމަށެވެ.

މިހާރު ރާއްޖެއަށް ކުރަމުންދާ ވިއްސާރަ އަލިވާނެކަމަށް ލަފާކުރެވެނީ އަންނަ ހަފްތާގެ ހޯމަދުވަހުން ފެށިގެން ކަަމަށް އެ އިދާރާއިން ހާމަކޮށްފައިވެ އެވެ. އެހެންކަމުން ކަނޑު ދަތުރުފަތުރުކުރާ ފަރާތްތަކުން މޫސުމަށް ސަމާލުވުމަށް އިލްތިމާސްކުރެ އެވެ.

މިހާރު މުޅި ރާއްޖެއަށް ކުރަމުންދާ ވިއްސާރައިގައި އިއްޔެ ވަނީ ބައެއް ރަށްތަކުގައި ފެން ބޮޑުވެ ގެތަކަށް ފެންވަނުމުގެ ސަބަބުން ބޮޑެތި ގެއްލުންތަކެއް ވެފަ އެވެ. އެގޮތުން ނ. ހެނބަދޫގެ 75 ގެޔަކަށް ފެންވަދެ ގެއްލުންތަކެއް ވަނީ ވެފަ އެވެ.