ރާއްޖޭގައި ވޭޕް ބުއިމާއި ވިއްކުމާއި ގެންގުޅުން މަނާ ވެފައިވަނިކޮށް، ގާނޫނާ ހިލާފުވި ހަތަރު މީހަކު 20،000 ރުފިޔާއިން ޖޫރިމަނާކޮށްފި އެވެ.

ފުލުހުން ބުނީ އިއްޔެގެ ނިޔަލަށް ދުންފަތް ކޮންޓްރޯލް ކުރުމާ ބެހޭ ގާނޫނާ ހިލާފުވި ހަތަރު މީހަކު ޖޫރިމަނާކޮށްފައިވާ ކަމަށެވެ.

މި ޖޫރިމަނާކޮށްފައިވަނީ ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އެއްވަނަ އިސްލާހާ އެއްގޮތްވާ ގޮތުގެ މަތިން ކަމަށް ފުލުހުން ބުނެ އެވެ.

ދުންފަތް ކޮންޓްރޯލް ކުރުމުގެ ގާނޫނަށް ގެނައި އިސްލާހާ އެކު މިދިޔަ އާދީއްތަ ދުވަހުން ފެށިގެން ވޭޕް ބޭނުން ކުރުން ރާއްޖޭގައި ވަނީ މަނާވެފަ އެވެ.

އެ ގާނޫނުގައި ވަނީ ވޭޕް ކުރުމަށް ބޭނުން ކުރާ އާލާތްތަކާއި އެ އެއްޗެއްސަށް ބޭނުން ކުރުމަށް ތައްޔާރުކޮށްފައިވާ އުފެއްދުންތައް އެތެރެކޮށްފި ނަމަ، 50،000ރ. އިން ޖޫރިމަނާ ކުރަން ކަނޑަައަޅައިފަ އެވެ. އަދި އެތެރެކުރި ކޮންމެ އިލެކްޓްރޯނިކް ސިނގިރޭޓެއް ނުވަތަ ވޭޕް ކުރުމަށް ބޭނުން ކުރާ އާލާތަކަށް 10،000ރ.ގެ މަގުން ޖޫރިމަނާ ކުރެވޭނެ އެވެެ.

މީގެ އިތުރުން އެފަދަ އާލާތެއް ނުވަތަ އުފެއްދުމެއް ވިއްކައިފި ނަމަ، 20،000ރ. އިން ޖޫރިމަނާކޮށް ވިއްކި ކޮންމެ އެއްޗަކަށް 10،000ރ.ގެ މަގުން ޖޫރިމަނާ ކުރެވޭނެ އެވެ.

ހަމައެހެންމެ އެފަދަ އާލާތެއް ނުވަތަ އުފެއްދުމެއް ހިލޭ ބަހައިފި ނަމަ، 10،000ރ. އިން ޖޫރިމަނާކޮށް، އެފަދަ އާލާތެއް ނުވަތަ އުފެއްދުމެއް ވިއްކީ ނުވަތަ ހިލޭ ބެހީ ކުޑަކުއްޖަކަށް ކަމަށްވާ ނަމަ، އިތުރު 50،000ރ. އިން ޖޫރިމަނާ ކުރެވޭނެ އެވެ.

މީގެ އިތުރުން އެފަދަ އުފެއްދުމެއް ބޭނުންކޮށްފި ނަމަ، 5،000ރ. އިން ޖޫރިމަނާ ކުރެވޭނެ އެވެ.