ރައީސް ޑރ. މުޙައްމަދު މުއިއްޒުގެ މި ސަރުކާރަކީ ކޮރަޕްޝަނާއި ދެކޮޅު ސަރުކާރެއް ކަމަށާއި ކޮރަޕްޝަނަށް އެއްވެސް ފުރުސަތެއް މި ސަރުކާރުން ނުދޭނެކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް ވިދާޅުވެއްޖެ އެވެ.

މިނިސްޓަރު އާދަމް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ރައްޔިތުންގެ ހައްގަކަށް އުނިކަމެއް ލިބޭނެ އެއްވެސް ކަމެށް ރައީސް މުއިއްޒަށް އެނގިވަޑައިގެން ހިނގިޔަ ނުދެއްވާނެކަމުގެ ޔަގީންކަން އެބައޮތް ކަމަށެވެ. އަދި ރާއްޖޭން ކޮރަޕްޝަން މަދުކުރެވޭނީ ކޮރަޕްޝަނަށް މަގުފަހިވާ ކޮންމެ ކަމަކަށް ހުރިހާ މުއައްސަސާތަކުންނާއި އާންމު ރައްޔިތުން ވެސް ނޫނެކޭ ބުނެގެންކަމަށް މިނިސްޓަރު ވިދާޅުވި އެވެ.

"ރައީސް މުއިއްޒު ކޮރަޕްޝަނަށް ފުރުސަތެއް ނުދޭނެ. ރައްޔިތުންގެ ހައްގަކަށް އުނިކަމެއް ލިބޭނެ އެއްވެސް ކަމެށް ރައީސަށް އެނގިވަޑައިގެން ހިނގިޔަ ނުދެއްވާނެ،" އާދަމް ވިދާޅުވި އެވެ.

މިނިސްޓަރު މިފަދައިން ވިދާޅުވެފައި ވާއިރު، ކުރީ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއު ބިންވެރިޔާ ސްކީމްގެ ދަށުން، ލިސްޓުގައި ނެތް ބަޔަކަށް މި ސަރުކާރުން ގޯތި ދިން ކަމަށް ބުނާ މައްސަލައެއް ވަނީ ފެންމަތިވެފަ އެވެ.

އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ، މުހައްމަދު ފަޒީލް ރަޝީދަށް ބިންވެރިޔާ ސްކީމްގެ ދަށުން ގޯތި ލިބިފައިނުވާއިރު، ގޯތި ހަވާލުކުރަން އޭނާ އެޗްޑީސީގައި އެދިފައިވާ މައްސަލައެއް އިއްޔެ ވަނީ ފަޅާއަރައިފަ އެވެ. އަދި އެޗްޑީސީގެ ކޮރަޕްޝަންގެ މައްސަލަތައް ރައީސް މުއިއްޒުގެ ސަމާލުކަމަށް ކުރީގެ ޗެއާމަން އަހްމަދު ޒުހޫރު ގެނައުމުން ރައީސް މުއިއްޒު އަޅާނުލާކަން ވަނީ ސާބިތުވެފަ އެވެ.