ފޮރިން މިނިސްޓަރު ޑރ. އަބްދުﷲ ހަލީލްގެ މަސްލަހަތު އޮތް ކުންފުންޏަކުން ވެސް ހުޅުމާލެއިން ބިމެއް ގަތްކަން ފަޅާއަރައިފި އެވެ.

މިކަން ފަޅާއަރުވާލީ މި ސަރުކާރުން ހިންގާ ވައްކަމާއި ކޮރަޕްޝަންގެ މައްސަލަތައް ފަޅާއަރުވަމުންދާ ހަސަން ކުރުސީގެ ނަމުގައި ހިންގާ އެކްސް އެކައުންޓުންނެވެ.

ރައީސް ޑރ. މުހައްމަދު މުއިއްޒުގެ ސަރުކާރުން ހުޅުމާލޭގެ ގިނަ ބިންތައް ވިއްކާފައި ވަނީ އުސޫލުން ބޭރުން ނުއަގުގަ އެވެ. މިކަމާ ބެހޭ ލިޔުންތައް ވެސް ހަސަން ކުރުސީ ވަނީ ލީކްކޮށްލާފަ އެވެ.

ފޮރިން މިނިސްޓަރު ހަލީލްގެ މަސްލަހަތު އޮތް ކުންފުނިން ގަތީ ހުޅުމާލެ ޕްލޮޓް 22377 ނަންބަރު ބިމެވެ. އެއީ ބީޗް ފްރޮންޓެވެ. ބިން ގަތީ ޖުމްލަ ކިހާ އަދަދެއްގެ ފައިސާއަކަށް ކަމެއް އަދި ސާފެއް ނުވެ އެވެ.

އެޗްޑީސީން އެ ބިން ވިއްކާފައި ވަނީ ހަލީލްގެ އަނބިކަނބަލުން ފަރީދާ އަބްދުލްއަޒީޒާއި ކޮއްކޯފުޅު ނަސްރުﷲ ޖަލީލްގެ ހިއްސާ އޮންނަ ނިބާ ނަމަކަށް ކިޔާ ކުންފުންޏަކަށެވެ. ނަސްރުﷲ އަކީ ފުލުސް އޮފިސަރެކެވެ.

ހަލީލްގެ މައްޗަށް ތުހުމަތު ކުރެވޭ ކޮރަޕްޝަންގެ ބޮޑު މައްސަލައެއް މިދިޔަ މާޗް މަހު ވެސް ވަނީ ފަޅާއަރައިފަ އެވެ.

އެއީ ހަލީލުގެ ޖަމިއްޔާ، އަބްދުﷲ ހަލީލް ފައުންޑޭޝަން (އޭކޭ ފައުންޑޭޝަން) އިން، އޭނާގެ އުފަން ރަށް، ފ. އަތޮޅު ތައުލީމީ މަރުކަޒުގައި، މީގެ ހައެއްކަ އަހަރު ކުރިން ދެ ބުރީގެ އިމާރާތެއް ހަދަން ކުވައިތް ފަންޑުން އެހީގެ ގޮތުގައި ހޯދި ގިނަ އަދަދެއްގެ ފައިސާއަށް ހިޔާނާތްތެރިވި މައްސަލަ އެވެ.

ފ. އަތޮޅު ތައުލީމީ މަރުކަޒުގައި ހަދާ އެ އިމާރާތުގައި ހިމެނެނީ ހަތަރު ކްލާސްރޫމާއި، ކޮމްޕިއުޓަރު ލެބެއްގެ އިތުރުން ޓްރެއިނިން ރޫމަކާއި ލައިބްރަރީއެކެވެ. އެ އިމާރާތުގެ މަސައްކަތް ފެށުމަށްފަހު ހުއްޓިފައި ހުންނަތާ އެތައް އަހަރެއް ވެއްޖެ އެވެ.

ކުވެއިތު ފަންޑުން ވަނީ އެ މަޝްރޫއަށް 200،000 ޑޮލަރު އޭކޭ ފައުންޑޭޝަނަށް ޖަމާކޮށްދީފަ އެވެ.

ކުވައިތު ފަންޑުން ދިން އެހީގެ ތެރެއިން ހަލީލުގެ އަމިއްލަ އެކައުންޓަށް ޖުމްލަ 89،080 ޑޮލަރު ޖަމާކޮށްފައިވެ އެވެ. ހަލީލުގެ އަމިއްލަ އެކައުންޓުން އޭކޭ ފައުންޑޭޝަންގެ އެކައުންޓަށް ދެ ފަހަރެއްގެ މަތިން ޖުމްލަ 8،080 ޑޮލަރު ޖަމާކޮށްފައިވާކަން ވެސް ވަނީ ފަޅާއަރައިފަ އެވެ.

އިނގުރައިދޫ ދާއިރާގެ މެމްބަރު އިބްރާހީމް ފަލާހު އެކައުންޓަށް ދެ ފަހަރެއްގެ މަތިން 20،000 ޑޮލަރު ޖަމާކޮށްފައިވެ އެވެ. އަދި ހަލީލުގެ ކޮއްކޮ ޝަމްސުﷲ ފަޒީލްގެ އެކައުންޓަށް 2،100 ޑޮލަރު އޭކޭ ފައުންޑޭޝަނުން ޖަމާކުރިކަން ވެސް ވަނީ ފަޅާއަރައިފަ އެވެ.

ދެން އެ ޖަމިއްޔާއިން ފައިސާ ދީފައި ވަނީ ހަލީލްގެ އެއްބަނޑު އެއްބަފާ ތިންބެއިން ހިއްސާދާރުންގެ ގޮތުގައި ތިބޭ އައިމް ކޮންސްޓްރަކްޝަނަށެވެ. އެ ކުންފުންޏަށް ދެ ފަހަރެއްގެ މަތިން ޖުމުލަ 9،050 ޑޮލަރު ޖަމާކޮށްފައިވާކަން ވަނީ ފަޅާއަރައި ފަވެ.

މި މައްސަލަ އެންޓި ކޮރަޕްޝަން ކޮމިޝަނަށް ހުށަހެޅި ނަމަވެސް އެ ކޮމިޝަނުން މި މައްސަލަ ނުބަލަ އެވެ.