ވޭސްޓް މެނޭޖުމަންޓް ކޯޕަރޭޝަން (ވެމްކޯ)ގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވި ޝަހީދު އިބްރާހިމް އެ މަގާމުން ވަކިކޮށްފި އެވެ.

ސަރުކާރުގެ އޮފިޝަލަކު ވިދާޅުވީ މަގާމުން ވަކިކުރި ކަމުގެ ސިޓީ ޕްރައިވެޓައިޒޭޝަން އެންޑް ކޯޕްރަޓައިޒޭޝަން ބޯޓް (ޕީސީބީ) އިން އޭނާއަށް މިހާރު ފޮނުވާފައިވާ ކަމަށެވެ.

އޭނާ މަގާމުން ވަކިކުރި ސަބަބެއް ސާފެއް ނުވެ އެވެ. ޝަހީދަކީ ނިމިދިޔަ ފަސް އަހަރު ޕީޕީއެމް، ޕީއެންސީން މަގުމަތީގައި ހިންގި އެކި ހަރަކާތްތަކުގައި ވެސް އިސްކޮށް އުޅުއްވި ބޭފުޅެކެވެ. އޭނާ އެ މަގާމަށް އައްޔަން ކުރީ މިދިޔަ އޭޕްރީލް މަހުގެ ތެރޭގަ އެވެ.

ވެމްކޯގެ ޑީއެމްޑީކަން އަދާކުރެއްވުމުގެ ކުރިން އޭނާ ވަނީ ފެނަކައިގެ ޑީއެމްޑީކަން ވެސް ކުރައްވާފަ އެވެ.

އޭނާ ވަނީ 17 އަހަރު ވަންދެން ސިފައިންގޭގައި ހިދުމަތް ކުރައްވާފަ އެވެ. ގއ. ދެއްވަދުއަށް ނިސްބަތްވާ ޝަހީދަކީ ޕީއެންސީގެ ގެމަނަފުށީ ދާއިރާގެ ރައީސެވެ. އޭނާ މަޖިލިސް ޕްރައިމަރީގައި ވެސް ވާދަކުރެއްވި އެވެ.