މި އަހަރުގެ ޑިސެމްބަރު މަހުގެ ޗުއްޓީގައި ދިވެހި އެއް އާއިލާގެ 40 މީހަކު އުމްރާގެ އަޅުކަމަށް ސައުދީ އަރަބިއްޔާއަށް ހިނގައްޖެ އެވެ.

އެކުގައި އުމްރާއަށް ގޮސްފައިވާ މި އާއިލާއަކީ ފުވައްމުލަކަށް ނިސްބަތްވާ އާއިލާއެކެވެ. އެމީހުން ސައުދީ އަރަބިއްޔާއަށް ދިޔައީ ޑިސެމްބަރު 16 ގަ އެވެ.

މިއީ ކުރީގެ މަޝްހޫރު ފިލްމީތަރި ޖަމްޝީދާ އަހުމަދުގެ އާއިލާ އެވެ. އުމުރާއަށް ދިޔަ މީހުންގެ ތެރޭގައި ޖަމްޝީދާގެ އެއްބަނޑު އެއްބަފާ ބައެއް މީހުންނާއި އެ މީހުންގެ ދަރިންނާއި އެ އާއިލާގެ ގިނަބަޔަކު ހިމެނެ އެވެ. މިދަތުރުގައި ޖަމްޝީދާ ވެސް އާއިލާއެކު ބައިވެރިވި އެވެ.

މިކަމާ ގުޅިގެން ސައުދީގައި ހުންނަ ރާއްޖޭގެ އެމްބަސީން ކުރި އެކްސް ޕޯސްޓެއްގައި ބުނެފައި ވަނީ އުމްރާގެ މަތިވެރި އަޅުކަމަށް ދިޔަ 40 މީހުންގެ އެ އާއިލާ އެމްބަސީއަށް ޒިޔާރަތް ކޮށްފައިވާ ކަމަށެވެ. އެ ގްރޫޕަށް މަރުހަބާ ދެންނެވީ ސަފީރު އަހުމަދު ސަރީރާއި މުވައްޒަފުންނެވެ.

އާއިލާގެ ގިނަ އަދަދެއްގެ ބަޔަކު އެކުގައި ދިޔަ ނަމަވެސް، އުމުރާއަށް ދިޔުމުގެ ހަރަދު ހަމަޖައްސާފައި ވަނީ އެމީހަކު އަމިއްލައަށް ކަމަށް އާއިލާއިން ބުނެ އެވެ. އެކި ސަބަބުތަކާ ގުޅިގެން މި ދަތުރުގައި ބައިވެރި ނުވެވޭ މެންބަރުން ތިބިކަން އެ އާއިލާއިން ފާހަގަކުރެ އެވެ.

މި އަހަރުގެ ސްކޫލް ބަންދާއި ދިމާކޮށް ރާއްޖޭގެ ގިނަ ބަޔަކު ވަނީ އުމްރާގެ އަޅުކަމަށް މައްކާއަށް ގޮސްފަ އެވެ. އެގޮތުން މިއަހަރު ޑިސެމްބަރު އުމްރާގައި ރާއްޖެއިން 6،373 އަށް ވުރެ ގިނަ މީހުން އުމްރާގެ އަޅުކަން އަދާ ކުރުމަށް މައްކާއަށް ދިޔަ ކަމަށް އިސްލާމިކް މިނިސްޓްރީން ބުނެފައިވެ އެވެ.